Дүлөй

Wikipedia дан

Дүлөйлүккулактын укпай калышы же өтө начар угушу. Мында катуу үндөрдү (ышкырык жана башка) же кулактын түбүнө кыйкырып сүйлөгөн тааныш сөздөрдү гана жакшы угат.

Дүлөйлүк эки жактуу жана бир жактуу болот. Көбүнчө бир жактуу Дүлөйлүк кездешет. Эки кулагы тең укпагандар атайын сурдологиялык жардамга муктаж болушат. Анын тубаса жана кийин пайда болгон түрү бар. Тубаса Дүлөйлүккө тукум куучулук жана кош бойлуулардын ар түрдүү жугуштуу оорулар менен оорушу же алкоголь ичимдиктерди ичиши же баланын кызылча, грипп, паротит менен оорушу түрткү болот. Ошондой эле кош бойлуу кезде кулактын калыптанышына таасир этүүчү дары заттарды колдонушу жана резус-фактор сыйышпастыктан келип чыгышы да мүмкүн. Төрөлгөндөн кийин пайда болгон Дүлөйлүккө кээ бир жугуштуу жана башка оорулар же кулактын кырсыкка чалдыгышы алып келет. Ошондой эле кесип зыяндуулугу (ызы-чуу, дирилдөө), металл буулары (мисалы, коргошун, сымап, мышьяк) менен уулануу түрткү болот.

Бала сүйлөй баштаганда (3 жашка чейинки) кулагынын укпай калышы дүлөй-дудуктукка алып келиши мүмкүн. Дүлөйлүк капысынан (катуу кармаган Дүлөйлүк) же барабара пайда болушу мүмкүн. Капысынан болгон Дүлөйлүккө мээге кан куюлуу же ички кулакты кан менен жабдуучу кан тамырлардын бүтөлүп калышы, ошондой эле капыстан өтө катуу дүңгүрөгөн үндүн таасири, артерия басымынын кескин өзгөрүшү, баштын кырсыкка чалдыгышы, өтө уулануу себеп болот. Отосклероздо, мээ кан тамырынын атеросклерозунда жана кесип зыяндуулугунда Дүлөйлүк бара-бара пайда болот. Бул Дүлөйлүктүн эң алгачкы белгиси — кулак чуулдоо. Угуунун төмөндөшү өтө жай жүргөндүктөн, ал укпай калганда гана сезилет. Ошондуктан Дүлөйлүктү пайда кылуучу ооруну өз убагында дарылоо зарыл.

Ар кандай кесип зыяндуулугу туруктуу Дүлөйлүккө алып келгендиктен жумушчулардын угуусун текшерип туруу, ызы-чуу жана дирилдөөнүн таасирин четтетүүчү чаралар көрүлүшү керек. Алдын алууда бала бакчадагы балдарды текшерүүнүн мааниси чоң. Дарылоодо ар кандай хирургиялык операция жакшы натыйжа берүүдө.


  • Кыргыз Совет Энциклопедиясынын Башкы редакциясы. «Ден соолук» Медициналык энциклопедия. - Ф.:1991, ISBN 5-89750-008-8