Муун (философия)

Wikipedia дан

Муун (орус. поколение) - философияда – тукумду улантуунун чынжырындагы белгилүү бир топко (ата-эне, балдар, неберелер); кандайдыр бир элге же маданий чөйрөгө таандык болжол менен бирдей курактагы адамдардын жыйындысы.

Баштапкы тектен, бабадан бирдей алыстыктагы туугандык мамиледе турган индивиддер тобу да муун деп аталат. Мисалы: адамда: ата-эне, балдар, неберелер удаалаш үч муунду түзөт; ата менен уулдун, эне менен кыздын ортосундагы убакыт аралыгы муун узундугу деп аталат жана ал орточо эсеп менен 30 жылга барабар. Муундун ишмердүүлүгү “коомду калыптандырган күч” (Мангейм) болуп эсептелет.

Муундун жашоосу үчүн зарыл шарттар болуп төмөнкү социологиялык кубулуштар саналышат: маданияттын мурдагы алып жүрүүчүлөрдүн ордун толуктаган маданияттын жаңы алып жүрүүчүлөрүнүн тынымсыз агымы; бир муундун маданиятынын алып жүрүүчүлөрүнүн тарыхый процесске катышуусунун убакыт боюнча чектүүлүгү; маданий жетишкендиктерди салт катары кийинки муунга өткөрүп туруунун зарылдыгы; Муундардын алмашышынын үзгүлтүксүздүгү.

Муун түшүнүгү көркөм жана адабий стилдерде, ошондой эле саясий идеяларда кеңири талкууланат. Муундар аралык проблема деп жаңы билимдерге жана тааным ыкмаларына эскилерге караганда зор маани берүү тууралуу кеп болуп жатканда кичүү муундун улуу муунга каршы күрөшүнөн пайда болгон конфликттердин жыйындысын түшүнүшөт;

Колдонулган адабияттар

  • Мамлекеттик тил жана энциклопедия борбору. Философия энциклопедиялык окуу куралы. - Б.:2004 ISBN 9967-14-020-8