Трихомоноз

Wikipedia дан
Трихомоноз

Трихомоноз — кишинин заара жыныс жолдорунун сезгенүү оорусу.

Трихомоноз козгогучтары[оңдоо]

Трихомоноздун козгогучу жыныс жолу менен берилет. Алар сырткы чөйрөнүн түрдүү таасирине туруксуз болушат. Козгогуч жыныс органдарынын былжыр челинде көбөйүп, андан бөлүнгөн суюктук аркылуу сыртка чыгат. Оорунун козгогучу кээде тазалыкты сактабаган учурда сүлгү, жүз аарчы жана башкалар буюмдар аркылуу жугат. Оору эркектерде анча билинбей өтөт. Бир аз былжыр суюктук бөлүнөт, эч жери оорубайт. Ошондуктан оорулуу убагында врачка кайрылбай жүрө берип, оорунун булагы болуп кала берет.

Таасири[оңдоо]

Трихомонозду убагында дарылабаса эн бездеринин кошумчаларынын сезгенүүсүнө (Эпидидимит) алып келет. Ушундан улам көпчүлүк учурда тукумсуздук пайда болот. Өнөкөт түрүнө өтүшү ыктымал.

Өнөкөт түрү[оңдоо]

Өнөкөт түрү оңой менен айыкпайт. Аялдар трихомоноз менен жабыркаганда жыныс кыны кычышып, ак суюктук бөлүнөт, ачышат. Организм начарлаганда, ошондой эле айыз келген учурда сезгенүү жатын жана анын кошумчаларына өтүшү мүмкүн (Аднексит, Метроэндометрит).

Дарылоо[оңдоо]

Эгерде оору аялынан табылса жубайы да кошо дарыланат. Трихомонозду дарылоо көпкө созулат. Ооруну чала дарылап же дарылануу үзгүлтүккө учураса оору кайта башталат. Дарылануу учурунда өзгөчө өздүк гигиенаны сактоо (ич кийимди үтүктөп, күндө кийим которуп кийүү, күндө жуунуу жана башкалар) зарыл. Дарылангандан кийин да 2—3 ай бою врачка текшерилип туруу талапка ылайык.

Колдонулган адабият[оңдоо]

Кыргыз Совет Энциклопедиясынын Башкы редакциясы. «Ден - соолук» Медициналык энциклопедия. - Ф.:1991, ISBN 5-89750-008-8