Флебит

Wikipedia дан
Флебит

Флебит (байыркы грек тилинен φλέψ, илик жөндөмөдө φλεβός — вена) — терең же тери алдындагы венанын сезгениши.
Көбүнчө бутта болуп, жугуштуу оорулардын, жараатка инфекция түшүүнүн, абцесстин, флегмонанын кабылдоосу катары жана төрөттөн кийин болушу мүмкүн (Төрөттөн кийинки оорулар). Флебиттин козгогучу ар кандай микроорганизмдер, көбүнчө стрептококктор болушат. Флебит демейде тромбоз менен коштолуп, тромбофлебитке алып келет. Катуу кармаган жана өнөкөт түрү бар. Катуу кармаган үстүртөн флебитте венанын үстүндөгү май клетчатка катууланат, кээде териде кызыл из пайда болот, дене көбүнчө ысыйт, жалпы абал начарлайт. Өнөкөт флебит көпкө созулуп, мезгили менен кайталанып турат. Терең веналардын флебитинде вена ооруйт жана дене ысыйт, ал эми көзгө көрүнгөн белгилер анча байкалбайт. Врач гана диагнозун коюп, дарылайт. Флебит менен жабыркаган бутту тынч абалда кармоо керек.
Алдын алууда терини, айрыкча бутту таза күтүү, майда жарааттарды жана ириңдүү ооруларды убагында дарылоо чоң мааниге ээ.

Колдонулган адабият[оңдоо]

Кыргыз Совет Энциклопедиясынын Башкы редакциясы. «Ден - соолук» Медициналык энциклопедия. - Ф.:1991, ISBN 5-89750-008-8