Алмаздуу аспаптар

Алмаздуу аспаптар — кесүүчү бөлүгү табигый же синтетикалык алмаздан жасалган жабдыктар. Ага жылмалоочу чарык, өгөө, алмаздуу кескич, кайрактуу (абразивдүү) аспаптарды курчута турган калем жана чыгырык (ролик), бургулоо аспаптары кирет. Аларды жасоодо күкүм же кристалл түрүндөгү алмаздар пайдаланылат. Колдонулушуна жараша алмаз күкүмдөрү органикалык ийилгич (резиналык), металл ж. б. байланыштыргычтары менен бириктирилет. Мында 100% түү кошулманын 1 мм³ катмарында 0,878 мг алмаз болот. Алар менен катуу куймалар, түрдүү конструкциялык (кварц айнеги, карапа ж. б.) жана курулуш материалдары (бетон, мрамор, гранит) иштетилет.

Колдонулган адабияттар

• “Кыргызстан” улуттук энциклопедиясы: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1