Мазмунга өтүү
Иншикак сүрөсү
- Меккеде түшүрүлгөн. 25 аяттан турат
- Кыргызча котормо мааниси
- Мээримдүү, Ырайымдуу Алланын аты менен!
- 1. Күтүүсүздөн асман жарылды!
- 2. Ал Раббисине моюн сунган эле жана (моюн сунушу) акыйкат болчу!
- 3. Жана жер (дагы) күтүүсүздөн (силкине-силкине) созулуп,
- 4. ичиндеги нерселерин (төрөгөн сыяктуу) чыгарып, бошонуп калды!
- 5. Ал дагы Раббисине моюн сунган эле жана (ушундай болушу) акыйкат болчу! (2)
- 6. О, инсан! Сен Раббиңе (жолугуу үчүн сооптуу же күнөөлүү иштер менен) түйшөлүп, акырында Ага жолуктуң. (3)
- 7. Кимдин (амал) китеби оң тарабынан берилсе,
- 8. Өтө жеңил суралат
- 9. Жана (бейиштеги) үй-бүлөсүнө сүйүнгөн бойдон кайтып келет.
- 10. Ал эми кимдин (амал) китеби арка тарабынан берилсе,
- 11. (Өзүнө) өлүм чакырат.
- 12. Жана тозокко ташталат!
- 13. Чынында, ал (дүйнө жашоосунда) үй-бүлөсүнүн арасында шат-курсант болчу.
- 14. Чынында, ал өзүн эч качан (Раббисине) кайтпачудай сезчү.
- 15. Жок! Андай эмес! (Ал раббисине кайтып барат!) Акыйкатта, Раббиси аны көрүп турган!
- 16. Мен (күн батып бараткандагы) күүгүмгө ант
- 17. Түнгө, жана да түн өз койнуна алган (бардык) нерсеге ант
- 18. Жана толгон кездеги (толун) айга ант (айтамын):
- 19. (О, инсандар!) силер аныгында, баскычтан баскычка минесиңер! (2)
- 20. Аларга эмне болду, ыйман келтирбей жатышат?!
- 21. Жана эгер аларга Кураан окуп берилчү болсо, (моюн суну менен) сажда кылышпайт?! (3)
- 22. Тескерисинче, каапыр болгон пенделер (кайра тирилүүнү) "жалган" дешет!
- 23. Бирок, алар ичине эмне жашырганын Аллах эң жакшы билет.
- 24. (О, мухаммад!) Сен аларга жан ооруткан азаптын кабарын бер!
- 25. А бирок, ыйман келтирип, жакшы (сооп) иштерди жасагандар (га бейишти сүйүнчүлө). Алар үчүн түгөнгүс сыйлыктар бар!
