Коомдук Телерадиоберүү Корпорациясы

Wikipedia дан
Коомдук Телерадиоберүү Корпорациясы
Ktrkshchb1.jpg
Аталышы Биринчи Коомдук Телеканал, КТРК
Өлкө Kyrgyzstanch.png Кыргызстан
Берүү чөлкөмү Kyrgyzstanch.png Кыргызстан
Rotating earth (large).gif Жер
Берүү убакыты 00:00 - 00:00 KGT
Берүү тилдери Кыргыз, Орус
Сүрөттүн форматы 16:9
Каналдын багыты Жалпы
Алгачкы берүү күнү Радио - 19-декабрь 1931-жыл,
Теле - 1958-жыл
Президенти Кубат Оторбаев
Урааны Ар дайым биринчи!
Дареги Coat of arms of Bishkek Kyrgyzstan.svg Бишкек, Жаш Гвардия гүлбагы, 59
Коомдук Телерадиоберүү Корпорациясы
Ырасмый сайты WWW.KTRK.KG
Коомдук телерадио корпорациясынын имараты


Кыргыз Республикасынын Коомдук телерадиоберүү корпорациясы (кыскача КТРК) – Кыргызстандын дээрлик жалпы аймагын өзүнүн телеберүүлөрү менен камсыз кылган улуттук телеканалдардын бири, калктын 99 пайызын телесигналы менен камтый алат.

Коомдук Биринчи телерадиоберүү корпорациясы эң көлөмдүү гана болуп эсептелбестен, Кыргызстандын эң популярдуу телеканалы болуп саналат. Бүгүнкү күндө – документалдуу жана көркөм кинокөрсөтүүдө алдынкы орундарды ээлеп, бат өнүгүп келе жаткан телекомпания, телекөрсөтүүлөрдүн аналитикалык жана көңүл ачуучу программаларын өндүрүүдө жана маалыматтык берүүдө лидер болуп саналат. Кыргыз Республикасынын Коомдук телерадиоберүү корпорациясынын жамааты бүгүнкү күндө өз ара кызматташтыкта жана ынтымакта иш алып барышууда.

Кыскача тарыхы

Кыргыз Мамлекетинин үнү болгон Кыргыз Радиосуна 80 жыл толду.

Демек Кыргыз Республикасынын коомдук телерадио корпорациясынына да 80 жыл толду. Анткени корпорациянын тарыхы дал ушул 1931-жылдан башталат. Кыргыз Радиосунун ачылышы телерадио корпорациясынын алгачкы тарыхы болуп эсептелет.

80 жыл айтканга оңой болгону менен не деген карт тарых ощол жылдардын кучагында калды. Уюткулуу кыргыз калкына радио жөнүндө түшүнүк өткөн кылымдын 20-жылдарында пайда болуп жер жерлерде алгачкы радио түйүндөр орнотула башаган экен. 1926-жылы Кыргыз автономиялуу областы Кыргыз АССРине айланат. Бул кубанычтуу окуяны Ала-Тоонун аймагына жайылтуу үчүн радиолоштуруу демилгеси башталат.

1927-жылы бул ой ишке ашып, Кыргыз АССРинин борбордук аткаруу комитетинин курултайы өтүп, аткаруу комитетинин төрагасы Абдыкадыр Орозбековдун доклады радио түйүндөр аркылуу элге угузулган.

Ал кезде азыркыдай ар бир үйдө радио түйүндөр кайдан болсун. Айылдын борбордук көчөсүнө же кызыл үйдүн жанына жыйылып алып эл радио укчу экен. Бирок радио уктурууларды даярдай турган мекеме ал кезде болгон эмес. Кыргыз АССРинин Элдик Комиссарлар Советинин алдында радио маалымат жана радио берүү Комитети 1931 – жылы 19- декабрда уюштурулат.

Борбордук аткаруу комитетинин токтомунун негизинде республикалык радиоуктуруу комитетинин төрагасы болуп Бектурсунов Сүйүнтбек 1931-жылдын 20-декабрында номери биринчи буйрук боюнча дайындалып, 1932-жылдын июлуна чейин иштейт.

Андан соң ошол кызматта Кыпчакбаев, Сарманов эмгектенишет. Алар аз иштегендиктерине карабай, радиодогу үгүт-насаат ишин жөнгө салуудагы алгачкы зор кыйынчылыктарды баштарынан кечиришип, радио аркылуу үгүт-насаат иштерин алгачкы уюштуруучулардан, баштоочулардан болушкан.

1932-жылдын аягында радиоточкалардын жалпы санын 4500ге жеткирүү каралган. 1932-жылдагы пландаштыруу боюнча 8500 радиоточкага, башкача айтканда 132 кишиге бирден точка туура келгендей даражада өнүктүрүлмөк.

1933-жылдагы 12 радиотүйүндүн он бири райондун борборунда, бирөө гана өнөр жай борборунда курулуу долбоорлонулган.

1933-жылдын аягында райондордун борборун радиотүйүндөр менен камсыз кылуу 91 ге жеткирилген.

Кыргыз радиосунун алгачкы кызматкерлери айтылуу төкмө акын Калык Акиев, музыкант Петр Шубин болушкан. Алгачкы дикторлору белгилүү мамлекеттик ишмер Сакин Бегматова, Кыргыз эл артисти Алиман Жангорозова, Жазуучу Касымалы Бектенов болгон.

1937-жылдан тарта 1946-жылдын 28-мартына чейин Кыргыз ССРинин Элдик Комиссарлар Советинин алдындагы радиомаалымат жана радио берүү Комитети деп аталат. 1937-жылдын 1-январында республикабызда, он экисинин өзүлөрүнүн программалары бар 43 радиотүйүн иштей баштаганын эске алганыбызда Кыргызстандын көпчүлүк бөлүгү радиоберүүлөр менен камсыз болуп калганын айтууга болот. Ошол жылдын планы боюнча республикалык берүүлөрдүн суткалык орточо көлөмү 6 саат 34 минутаны түзгөн. Анын төрт сааты жергиликтүү берүүлөргө тиешелүү эле. Уктуруулар кыргыз, орус жана дуңган тилдеринде жүргүзүлгөн.

1938-1941-жылдары радио комитеттин төрагасы болуп Төлөн Шамшиев дайындалат. Улуу-Ата Мекендин Согуш жылдарында радионун ролу күчөгөн. Кыргызстандын эң күчтүү маалымат булагы болгон. Экстратов, Курман Кыдырбаева сындуу адамдар жетекчилик кылып, Капар Алиев, Гүлниса Мамбетова, Валентина Гонтарь дикторлук кесиптин устаттары болуп таанылган. Белгилүү драматург Токтоболот Абдымомунов акыркы кабарлардын редактору болуп иштеген.

1945-жылдын 28-мартынан тарта Радиомаалымат жана радиоберүү Комитети Кыргыз ССРинин Министрлер Советинин алдында кайрадан түзүлөт.

1949-1953-жылдары Радио комитетти белгилүү драматург жана коомдук ишмер Молдогазы Токобаев жетектеген.

1950-жылдын март айынан тарта шаар, айыл, кыштактарды радиолоштуруу Кыргыз ССРинин Байланыш министрлигинин карамагына өткөндүгүнө байланыштуу Радиомаалымат Комитети Кыргыз ССРинин Министрлер Советинин алдына өтөт. Бул ат менен ал 1953-жылдын май айына чейин аталат.

1953-жылдын май айынан тарта өлкөнүн министрликтери жана мекемелери кайрадан түзүлгөндүгүнө байланыштуу, Радиомаалымат Комитети Кыргыз ССРинин Маданият министрлигине караштуу Радиомаалымат боюнча Башкы Башкармачылык деп өзгөрөт. Башкармалыктын начальниги Тургунбек Суванбердиев болгон. Бирок жашоо шарты радио иштериндеги ири өзгөрүүлөрдү талап кылгандыктан, Кыргыз ССРинин Министрлер Советинин 1957-жылдын 5-июлдагы №240 -Токтому менен кайрадан Радиоберүү Комитети деп аталат.

Жылдан жылга радиоберүү көлөмү жогорулаган сайын, радионун кичүү иниси – телеберүү пайда болот. Аны менен бирге Комитет жамааты эки эсе өсөт. Мунун бардыгы уктуруулардын идеялык деңгээлинин жакшырышын талап кылып, жеринен чагылдыруу күчөтүлөт.

1958-жылы Кыргыз ССР министрлер Советинин алдында Радио жана теле берүү комитети уюштурулуп, Фрунзе телестудиясы 30-декабрда ишин баштайт. Анын биринчи төрайымы болуп Рабия Менсеитова дайындалган. Кыргыз телевидениесинин биринчи диктору Сайнаке Жунушалиева, биринчи режиссер Жанузак Молдобаев,биринчи редактору Шаршеке Сматов, биринчи үн оператору Светлана Варибада, биринчи оператору Курманбек Өгөбаев болгон.

1961-жылдан 1964-жылга чейин телерадио комитетти Айымбүбү Ботоканова жетектеген.

1962-жылдын май айынан тарта Кыргыз ССРинин Министрлер Советинин алдындагы Радио жана телеберүү Комитети – Радио жана телеберүү боюнча Кыргыз ССРинин Министрлер Советинин Комитетине алмаштырылат.

1965-жылдын 10 – апрелинен тарта Кыргыз ССРинин Жогорку Советинин Президиумунун №539-Жарлыгы менен Комитет Мамлекеттик деген маккамга жетип, Радио жана телеберүү боюнча Кыргыз ССРинин Министрлер Советинин Мамлекеттик Комитети деп аталат.

1964-жылы Кыргыз ССРинин Министрлер Советинин алдындагы Радио жана телеберүү Комитетинин төрагасы болуп Асанбек Токомбаев дайындалган.

Асанбек Токомбаев Кыргызстандын телерадиосун 21 жыл башкарган, эң узак жыл жетектеген жетекчи катары тарыхта калды. Телерадио комитетке бир күн жетекчилик кылуу оңой эмес. 1964-жылдан 1985-жылга чейин залкар инсан 21 жыл бир орунда үзүрлүү эмгектенип азыркы телерадио корпорациянын жамааты иштеген имаратты, Радио үйүн, Телестудиялык имаратты салдырган. Асанбек Токомбаев КТРКнын тарыхында ысмын өзгөчө бөлүп айта турган инсан.

1985-1986-жылдары комитеттин жетекчилигине Асанбек Стамов дайындалат. Андан соң 1986-91-жылдары Умтул Орозова жетекчилик кылган.

1991-жылы Кыргыз Республикасынын Мамлекеттик телерадио агенствосу болуп түзүлүп анын башчылыгына Сатыбалды Жээнбеков дайындалган.

1992-жылы жылы телерадионун жетекчилигине Түгөлбай Казаков, 1993-жылы Кадыркул Өмүркулов, 1994-жылы Абдуламит Матисаков келген.

1993-жылы агенство кайрадан комитет болуп өзгөртүлгөн.

1995-жылы Кыргыз телевидениесинде таңкы “Замана” студиясы ачылган.

1996- Кыргыз Республикасынын Мамлекеттик телерадио комитети корпорацияга айландырылып төрагасы президент болуп аталып, ал орунга Аманбек Карыпкулов дайындалат.

Кыргыз телевидениесинде Ала-Тоо маалымат борбору, Нур продюсердик борбору, Ата-Журт продюсердик борбору түзүлөт.

Мурдагы редакциялар чыгармачылык өндүрүштүк бирикмелер болуп түзүлөт. Адабий драмалык редакция- “Манас” чыгармачыл өндүрүштүк бирикмеси, жаштар редакциясы- “Айкөл”, коомдук саясий- “Ата-Журт”, элдер достугу- “Достук” бирикмелери болуп аталган.

Кыргыз Радиосунда адабий драмалык редакция – “Казына”, музыкалык- “Ибарат”, балдар жана жаштар – “Жаш толкун”, кабарлар- “Кабарлар”, коомдук саясий- “Кыргызстан” ч.ө.б. болуп аталат. Кыргыз радиосунун 2-программасы “21-кылым радиосу” болуп ачылат.

2001-жылы корпорациянын президенти болуп Молдосейит Мамбетакунов, 2002- жылы Токтош Айтикеева дайындалат.

2003-жылы Кыргыз Республикасынын Мамлекеттик телерадио корпорациясы- Кыргыз Республикасынын Улуттук телерадио корпорациясы деп аталып “Улуттук” статуска ээ болот.

2004- корпорациянын президентигине Сыртбай Мусаев, 2005-жылы Султан Абдракманов, ошол эле жылы Кыяс Молдокасымов дайындалат.

2006-жылы Кыргыз Республикасынын Улуттук телерадио корпорациясы- Кыргыз Республикасынын Мамлекеттик телерадио комитети болуп өзгөртүлүп, анын жетекчиси генералдык директор болуп өзгөртүлөт.

Чыгармачылык бирикмелер редакцияларга, студияларга өзгөртүлгөн.

2007-жылы комитеттин генералдык директору болуп Мелис Эшимканов дайындалган.

2008- жылы Кыргыз Республикасынын Мамлекеттик телерадио комитети кайрадан Кыргыз Республикасынын Улуттук телерадио корпорациясы деп аталат.

2009-жылы корпорациянын башкы директору болуп Кайыргүл Орозбай кызы дайындалган.

2010-жылы Апрель элдик революциясынан кийин корпорациянын жетекчилиге Кубат Оторбаев келип, элдин талабы менен Кыргыз Республикасынын коомдук телерадио корпорациясы болуп өзгөртүлүп, Кыргыз Республикасынын президенти бул жарлыкка кол койгон. Коомдук телерадио корпорациянын байкоочу кеңеши шайланып. Курамы 15 кишиден турган байкоочу кеңеш төрагалыгына Эльвира Сариеваны шайлаган. Корпорациянын президенттигине конкурс жарыяланып 2010-жылдын декабрь айында конкурстан жеңип алып Оторбаев Кубат Табылдыевич 5 жылдык мөөнөт менен башкы директор болуп шайланган. 2011-жылдын январь айында байкоочу кеңеш башкы директордун орун басарлыгына Мырзакул Мамбеталиевди жана Кайрат Иманалиевди шайлаган. КТРКнын редакциялык саясатын бекиткен.

Учурда корпорацияда Коомдук 1-канал, анын курамында Ала-Тоо маалымат борбору, “Замана” студиясы, “Ибарат” студиясы, жаштар редакциясы, социалдык-экономикалык программалар редакциясы, “Дөөлөт” студиясы, “Келечек” студиясы бар. Ошондой эле, КТРКнын “Кыргыз радио бирикмесинде” 5 радио иштеп жатат. Алар: “Биринчи Радио”, “Кыргыз Радиосу”, “Миң кыял FM" радиосу”, “Түнкү Белес радиосу” жана “Балдар ФМ” радиосу.

Корпорациянын курамында Республикалык Радио Теле Борбор, "Кыргызтелефильм" студиясы бар.

Биринчи каналдын бөлүмдөрү

Ала - Тоо

Коомдук телерадио корпорациясынын Ала-Тоо маалымат программасынын студиясында Кубат Оторбаев жана Кыргыз Республикисынын үчүнчү президенти Роза Отунбаева

Коомдук телерадиокорпорациянын жаңылыктар жана аналитикалык материалдары үчүн жооптуу «Ала-Тоо» дирекциясы жаңылыктарды эртең мененки саат жетиден тартып ар бир эки саат сайын эфирге чыгарат. Ар бир чыгарылыштын узундугу 10 мүнөт жана алар обого 07:00, 09:00, 11:00, 13:00, 15:00 жана 17:00дө кыргызча жана орусча болуп кезектешип чыгат. Кечинде болсо бир 40 мүнөттүк орусча (19:30да) жана эки жолу кыргыз тилинде (40 жана 30 мүнөттөн) корутунду «Ала-Тоо» программалары чыгат (21:30 жана 23:00дө). Алар бир-бирин кайталабайт жана ар бири обого түз чыгат.

Ишемби-жекшемби жана майрам күндөрү жаңылыктар чыгарылышынын саны азыраак, бирок сөзсүз бар: ишемби күнү орусча 12:00 жана 16:00дө, кыргызча болсо 14:00 жана 18:00дө, ал эми жекшемби күнү 12:00 жана 16:00дө чыгат, алардын узундугу 10 мүнөт.

Андан тышкары, ишемби күнү «Жумакайрык» жана жекшембиде кечинде «Итоги недели» деген аналитикалык программалар даярдалып обого чыгат (21:00дө), ар бири 40-45 мүнөттөн. Жумуш күндөрү кечинде обого англисче жаңылыктар да бар – 18:00дө.

Мезгил-мезгили менен «Ала-Тоо» дирекциясынын журналисттери узундугу 10 мүнөттөн 20 мүнөткө чейинки кайсы бир актуалдуу темадагы «Атайын репортаж», «Атайын чыгарылыш» же мезгилге ылайыктуу интервьюларды даярдап, обого чыгарат жана башка редакциялардын программаларын даярдоого да катышат – дикторлук же операторлук иш, же болбосо «Ала-Тоо» тарабынан даярдалган материалдарды пайдалануу, же башка редакциялардын суранычы менен региондордо атайын сюжет даярдап, Бишкекке салып жиберүү жана башка.

Өлкөнүн ар бир облусунда «Ала-Тоонун» кабарчылары бар, алар дээрлик күнүгө жергиликтүү жа ңылыктарды камтыган кабарларды берип турат жана атайын репортаждарды же интервьюларды дагы даярдайт. Кайсы бир аймакта орчундуу окуя чыкканда, ал боюнча жеринен кабар алыш үчүн, кээде Бишкектен журналисттер жиберилет.

«Ала-Тоонун» журналисттери чет өлкөлөрдө өткөн окуяларды чагылдырыш үчүн дагы такай ар башка мамлекеттерге барып турат жана кыргызстандык же эл аралык уюмдар уюштурган семинар, конференция, же башка иш-чараларга такай катышат.

Замана студиясы

1995-жылы 2-июнда "Замана" программасы эфирге чыгып, алгач жолу улуттук каналда таңкы программа эфирге чыккан. Ошентип, 1995-жылдан баштап Олжобай Токтосунов, Динара Кодуранова, Алмаз Абдраев жана Кадыр Кошалиев окшогон таланттуу журналисттердин чыгармачылык изденүүсү жана Улуттук каналдын ошол учурдагы президенти Абдиламит Матисаковдун колдоосу менен “Замана” программасы эфирге чыга баштаган. Эң алгачкы көрсөтүүнү Динара Кодуранова менен Алмаз Абдраев алып барышкан.

"Замана" алгач 30 мүнөттөн гана күн алыс Чүй өрөөнүнө көрсөтүлүп, анан гана бүт республикага таркатылган. Башында бүт эфир кыргыз, орус тилдеринде аралаш болсо, азыр жуманын бир күнү кыргыз, экинчи күнү орус тилинде көрсөтүүлөр берилип турат. “Замана” студиясын 11 жылдан ашуун убакыт кыргыздын таанымал диктору Тамара Жаманбаева жетектеген.

1995-жылы түзүлүп дээрлик 10 жылдан бери үзгүлтүксүз эфирге чыгып келген “Замана” студиясынын аталышын 2005-жылдын 24-мартынан кийин келген жетекчилер өзгөртүп көрүшкөнү менен, мезгил жана көрүүчүлөр ар дайым “Замана” катары таанып келгендиктен, 2008-жылдын 11-февралынан кийин кыска тыныгуудан соң, алгачкы аталышы кайра ыйгарылган.

Ошол эле кыска мөөнөттүн ичинде таңкы программа көрүүчүлөрдүн талабын эске алып, техникалык базасы менен даярдаган продукцияларынын сапатын өзгөртүүнүн араткетинде келди.

"Замана" студиясынын алгачкы пайдубалын койгон Динара Кодуранова жана узак жылдардан бери иштеп келген баяндамачылар Атахан Кожогулов, Акыл Абдылдаева, Анара Бейшекеева, телеоператор Жаныш Саманчиев, көркөм жетекчи Назгүл Мусаева дагы да болсо студиянын негизин түзөт. Учурда, баяндамачы Владимир Гробовой, кабарчылар Айдана Стамова, Мунара Матиева, Чынара Карасартова, Мирбек Камчыбеков, Айнура Жамгырчиева, Айсулуу Асанбекова жана режиссерлор Асыл Акматова, Айнура Султанбекова чыгармачылык салым кошкон жамаатты түзүп, студияны Жыпара Арыкова жетектейт. “Замана” студиясы 2011-жылы Андрей Миясаров атындагы IV Улуттук гезит сыйлыгында басма сөз журналисттери менен чыгармачылык байланышта тыгыз кызматташкандыгы үчүн 7 телеканалдын ичинен суурулуп чыгып дипломго ээ болду. “Замана” студиясы 2010-жылы 8-декабрь телевидение күнүндө бир кызматкерибиз А. Кожогулов Президенттин ардак грамотасын алса, эки кызматкерибиз КТРКнын мыкты кызматкери болушту көптөгөн кабарчы журналистерибиз ички сыйлыктарды, министирликтердин ардак грамотасы төш белгилерин алышты. 2011-жылдагы 1-коомдук каналдын телеберүүлөрдүн рейтингинин жалпы жыйынтыгы боюнча көрүүчүлөрдүн 50 пайызы "Замана" студиясын көрөт.

«Замана» студиясы жумасына 6 күн, күнүнө үч сааттан жумасына 18 саат продукция даярдайт. Программалардын 50 пайызы тааным (познавательный) багытында болсо, 10 пайызы маалыматтык, 20 пайызы маданий-көңүл ачуучу, 15 пайызы улуттук баалуулуктар багытына арналат.

Эртең менен көрүүчүгө жеңил, жарык маанай керек, ошондуктан таңкы программаны көңүл ачуу жаңылыктары, таанып билүү максатында даярдалган рубрикалар, анан көрүүчүлөрдүн калың катмары ар дайым күткөн музыкалар менен коштолуп турат. Таңкы программабыздын туруктуу көрүүчүлөрү үчүн атайын өз ишин мыкты билген адистер келип, медицина, билим берүү, пенсия, айыл чарба ж.б. тармактар боюнча көрүүчүлөрдү суроолоруна түз эфир аркылуу жооп беришет. “Замана” программасынан күнүнө "Ала-Тоо" маалымат борборунун даярдаган жаңылыктар блогу эки ирет эфирге чыгат. "Таң супа", "Китепкөй", "Доктор+", "Афиша", "Таттуу маанай", "Тил керемети", "Бул күнү" рубрикаларынын аталыштары айтып тургандай ар биринин өз максаттары, эфирдик ыкмалары бар. Ал эми түз эфирде студияда өткөн "Актуладуу маек" рубрикасы маалымат маанайында учурдагы маанилүү делген темага арналса, "Таңкы мейман" рубрикасы жеңил маанай тартуулап, акындар, жазуучулар,композиторлор, сүрөтчүлөр, ырчылар чакырылып, чыгармачылыктары туурасында кенен ой-бөлүшөт.

"Замана" студиясындагы өтүп жаткан түз эфирдеги маектерге биздин жети облусубуздун ар бир айылынан телефон менен байланышка чыгып, өз көйгөйүн ишке ашырып алгандардын саны арбын, буга түз байланыш аркылуу алынып жаткан суроолор, жооптор далил болот. Ошондуктан эл оозуна алынып жакшы маанай жаратып келе жаткан таңкы программаны Кыргызстан боюнча активдүү көрүшөт.

СЭИП

Социалдык-экономикалык жана инновациалык программалардын редакциясы (СЭИП) - КРнын Коомдук Телерадиокомпаниясындагы маанилүү бөлүмдөрдүн бири. Аталган бөлүмдө негизинен социалдык жана экономикалык багыттагы телекөрсөтүүлөр, долбоорлор даярдалып,эфирге чыгып келет. СЭИП редакциясында коомдун заманбап өнүгүшүнө салым кошкон фундаменталдуу темалар болуп экономика, саясат, билим берүү, айыл-чарбасын өнүктүрүү жана башка ушул сыяктуу программалар саналат.КТРК дагы бул редакцияда маанилүү делген автордук долбоорлор, туз эфирлер, мамлекеттин ичиндеги актуалдуу жана масштабдуу делген жанылыктарды түз алып корсотүү, он-лайн режиминин негизинде жакынкы жана алыскы чет өлкөлөр менен (Турция, АКШ, Азербайжан ж.б. телекопуроолор (Телемост) көрсөтүлүп келет.

СЭИП редакциясы 1962-жылы негизделип, саясий жана экономикалык программалардын Башкы редакциясы деп аталган.

1970-1991 жж-саясий, экономикалык жана айыл-чарбасына арналган программалар даярдалып турган.

1998-жылы СЭИП редакциясы «Ата-Журт» ТПО болуп, «Ала-Тоо» маалымат-аналитикалык борборунун структуралык бөлүмдөрүнүн бири болуп келген.

2005-жылдын апрель айында СЭИП ти социалдык жана экономикалык программалардын Башкы редакциясы деп белгилуу журналист Байма Сутенова тарабынан аталып калган.

2008-жылы редакциясы СЭИП-социалдык-экономикалык жана инновациялык программалардын башкы редакциясы деп белгиленген.

Социалдык-экономикалык жана инновациялык программалардын башкы редакциясы тузулгондон баштап эле телевидениедеги эн бир орчундуу жана маанилүү редакциялардын бири болуп, калкты ар түрдүү форматтагы, жаныча жанрдагы анын ичинен түз эфир жана башка актуалдуу делген маалыматтар менен камсыздап, коомдук ан-сезимдин өнүгүшүндө чон роль ойноп келет.

Жаштар редакциясы

Штаттагы кыматкерлердин саны: 17 адам

Алардын ичинен: Кыргыз республикасынын маданиятынын отличниги: 2 адам Телевидениянын отличниги: 3 адам

Бүгүнкү күндөгү теле долбоорлор: - “Акыл ордо” интеллектуалдык долбоору - “Контрольная для взрослых”, “Балдардын сынагына сынбайсыңбы?” ток-шоулары - “Түнгө карай”, “Сегодня ночью” ток-шоулары - “Муз обо” көңүл ачуу көрсөтүүсү. - Түз эфирдеги Бишек-Анкара-Баку телекөпүрөсү - “Кыргызстандыктар” атайын репортаждары. - “Ата-энелерге” ата-энелерге арналган көрсөтүү

Мурда эфирге чыккан көрсөтүүлөр: - “Тушоо кесуу”, “Житейские мелочи” ток-шоулары - “Жаштар KG” ток-шоусу - “12 раунд” ток-шоусу - «Любовь случается» реалити- шоу - «Унуталбайм» теле - новелласы - «Капкан шоу» көңүл ачуу көрсөтүүсү - «Технология мечты» атайын репортажы - «Я изменяю мир…» атайын репортажы - «Голос молодежи» 2010 жылдагы Ош ыңкылабы учурунда олуттуу жерлерден тартылып келген атайын репортаждар сериясы. - 80-90 жылдарга арналган Жаңы жылдык дискотека. - Сүйүү күнүнө арналган дискотека. - “Айымдар аянты” Эл аралык аялдар күнүнө арналган, жылдыздардын майрамдык телеконкурсу. - «Мекеним, Кыргызстан!», Кыргыз республикасынын эгемендүүлүгүнүн 20 жылдыгына арналган майрамдык концерт.

Студиянын сыйлыктары:

- УТРКнын эң мыкты редакциясы 2009 - КТРКнын эң мыкты редакциясы 2010 - КТРК 2010 эң мыкты долбоору «Контрольная для взрослых/ Балдардын сынагына сынбайсынбы?» теле- шоусу. - КТРКнын эң мыкты редактору 2010, КТРКнын эң мыкты режиссеру 2010, КТРКнын эң мыкты алып баруучусу 2010, - “Умтулуу 2009” сыйлыгы. «Контрольная для взрослых» Интерньюс. - “Экономика 2010” сыйлыгы “Түнгө карай” Бишкек ишкерлер клубу. - Студиянын көрсөтүүлөрү КР Жогорку Кеңешинин, Экономика министрлигинин, Маданият министрлигинин, Саламаттыкты сактоо министрлигинин, Жаштар министрлигининин жана башка уюмдардын бир катар дипломдоруна, ардак грамоталарына татыган.

Студиянын өнөктөштөрү

- «Сорос - Кыргызстан» фонду - ЮНИСЕФ - ПРООН - Ага-Хан фонду - МФИС - ОБСЕ - АКШ элчилиги астындагы демократиялык комиссиясы - Туркиянын ТРТ Аваз телеканалы. - Оруссиянын СТС телеканалы - Азербайджандын Азер ТВ биринчи мамлекеттик каналы - I-Media - CAFMI - BBC - IWPR - BMI

Келечек

КТРКнын «Келечек» студиясы балдарга билим, тарбия берүү багытында 2011-жылдын февраль айында түзүлгөн.

«Келечек - балдардын колунда» деп айтабыз, мына ушул келечегибиз болгон балдарга азыртадан билимине, тарбиясына, коомдогу ордуна көңүл бурушубуз керек.

«Тарбия берүү- улуу иш; ошол аркылуу адамдын келечек тагдыры чечилет » деп педагог , ойчул Белинский айткандай, Мамлекетибиздин келечеги болгон балдарды тарбиялоодо үй-бүлөнүн, мектептин эле эмес телекөрсөтүүнүн дагы таасири чоң экендигин эске алуу менен билим, тарбия берүүчү,таанып-билүүчү программаларды даярдоо биздин негизги максатыбыз

Келечек студиясында учурда 10 кызматкер эмгектенет

Көрсөтүүлөр боюнча маалымат:

1. Балдардын жарандык жактан калыптануусу,социалдык өнүгүшү,билим алуусу, ден соолугу жана ж.б ушул өңдүү актуалдуу проблемаларын чагылдырган «Коом жана балдар» ток- шоу программасы жумасына 1 жолу эфирге чыгып келет

2. Таанып- билүү, тарбиялык мааниси бар: «Келгиле үйрөнөбүз», «Таалимтай», “Баарын билгим келет”, “Жомок дүйнөсүнө саякат”, «Салам жаш таланат» көрсөтүүлөр

3. Билим берүү жана мугалимдин билимин жогорулатуу максатында «Телесабак» жана «Азыркы мезгилдин мугалими» программасы;

4. «Манас таануу» – теле сынагы;

5. Көңүл ачуу форматындагы «Күлүп кой», «Бала тили бал» рубрикалары бар.

Дөөлөт студиясы

Коомдук телеканалдын "Дөөлөт" котормо студиясы Кыргыз Республикасында телеканалдын алдында биринчилерден болуп 2005-жылы азыркы анын башкы редактору Мусакеев Орозбек Молдевичтин жеке демилгеси менен уюштурулган. Негизги максаты чет тилдердеги мультипликациялык, көркөм, илимий таанып-билүүчүлүк, даректүү жана расмий тасмаларды кыргыз тилине которуп жана үндөрүн толук коштоп, көрүүчүлөргө тартуулайт. Булардын сырткары "Дүйнө таануу ", "Укмуштар сыры ", "Жаныбарлар дүйнөсүндө" ,"Бул кантип жасалат?" жана "Сырдуу дүйнө" деген илимий материалдардан алынып даярдалган көрсөтүүлөрү бар. 2010- жылдын декабрь айынан бери интернет жабдууларына арналган "Матрица" эфирге берип келет. "Ажайып ата мекеним" "Дин маданияты", жана "Ар намыс алды аракет" да долбоорлору бар.

Атайын жабдылган 3- студиясында 9- адам эмгектенет: башкы редактору жана ошол эле мезгилде котормочусу Орозбек Мусакеев, редактор-котормочу Айгүл Сагыновна Жумагулова, үн коштоо режиссеру Айнаш Шамбетовна Аширова, Кыял Төрөгулова, менеджер Жазгүл Имакова, 4- монтажер Самара Рысалиева, Азамат Маданбеков, Кубанычбек уулу Искен, Солдатбек уулу Адилет.

Беш жылдан ашуун мезгилдин ичинде 900-дөн ашуун мультипликациялык, 1300 дөн ашуун илимий таанып билүүчүлүк жана 100гө жакын көркөм тасмаларды которуп , элге жеткиришти.

Бул күндөрү Түркиянын 26- сериялуу "Жалындуу жаштык жылдар", Ирандын 2- бөлмөлүү "Эли" көркөм тасмалары жана "Маша жана Аю" мультфильми которулуп болуп үн коштоо иштери аткарылууда.

КТРК радио тармагында

Биринчи радио

2011 жылдын 1 январынан “Кабарлар” радиосу “Биринчи радио” болуп калды. «Биринчи» Радио– 80 жылдык тарыхы бар өлкөдөгү алгачкы радиостанциянын көчүн улантууда. Радиостанциянын чакырыгы алгач 1931-жылы декабрь айынан зым аркылуу берилүүчү эфирдин баскычы аркылуу обого таркай баштаган. Бүгүн «Биринчи Радио» бүтүндөй Республиканын аймагына маалымат таркатууда зор мүмкүнчүлүгү бар бирден бир радио. FM толкундарынан тышкары, УКВ ультра кыска толкуну жана интернет жана спутник байланышы аркылуу real -audio режиминде техникалык мүмкүнчүлүктү пайдалануу менен Кыргызстанда, жакынкы жана алыскы чет өлкөлөрдө жашаган 5 миллиондон ашык адам бул толкунду кармай алышат. Кыргыз Республикасынын Коомдук телерадио корпорациясына караштуу, FM диапазонундагы «Биринчи Радио» маалыматтык радиоберүү катары, өлкөнүн маалыматкоопсуздугун камсыз кылуу багытында саясатты ишке ашырууда.«Биринчи Радио» All Talk Radio «Баардыгы жөнүндө», тактап айтканда саясый, экономикалык жана маданий, спорт жаңылыктарын суткасына 18 саат бою, ал эми жакынкы мезгилден тартып 24 саат бою обого чыгып, бүтүндөй өлкөнүн аймагына, өз учурунда, так жана толук жеткирүүчү жалгыз гана радио. Бул биздин программалык саясатыбызда угармандар күткөн маалыматтардын оперативдүүлүгү жана жеткиликтүүлүгүн камсыздоо.

Станциянын негизги мүдөөсү зарыл маалыматтарды таркатуучу ишенимдүү маалымат таркатуу булагы катары, угарман журттун ишенимин камсыз кылып, “бийликтеги чакан топтун кол баласына айланган канал” –деген түшүнүктөн арылуу. Анан да “Биринчи” радионун башкы мүдөөсү улуттук азчылыктар ортосунда, муундар арасында жана бардык конфессиядагы адамдарды жакындаштыруу үчүн көп кырдуу багыттагы, эң бир түйүндүү маселелерди козгогон: жакырчылык көйгөйлөрүнөн тартып, саламаттыкты сактоо, билим берүү, атактуу жана карапайым адамдардын бейнеси тууралуу түрдүү тармакты камтыган уктурууларды даярдоо менен турмушка жакын болуу башкы милдет. «Биринчи Радиодо» эфирди тарыхый, эксклюзивдүү репортаждар жана кыргыз радиосунун “алтын казынасындагы” уникалдуу материалдар менен байытуу мүмкүнчүлүгү бар. Биздин радионун эфиринде чет элдик жана орусиялык атактуу саясатчылар, экономисттер, ишкерлер, коомдук ишмерлер, артисттер жазуучулар жана спортчу жана башка атактуулардын үнү жаңыра бермекчи.

«Биринчи радио» берүүсүнүн кеңири концепциясы;

Долбоордун кыска жана узак мөөнөткө каралган максаттары; «Биринчи Радио» алгачкы башталыш катары төмөндөгү максаттарды белгилейт: - Кыргызстандын Медиа рыногунда күнү түнү обого чыккан негизги жана жалгыз гана маалымат каналы болуп калуу; - Эфирге чыгуунун сапатын арттыруу үчүн радио толкундарын берүүчү жаңы технологияларды өздөштүрүү; - программа түзүү саясатын, аудиториянын кызыкчылыгына шайкеш келтирүү; Станция белгилеген стратегиялык максаттар: - 3 жылдын ичинде сарпталган каражаттарды толугу менен калыбына келтирүү; - Сатуу саясатын активдештирүүнүн аркасында, жыл сайын 10 пайыздан кем эмес пайда алып келүү менен кирешелүү ишканага айлануу; - Кыргыз Республикасындагы бирден бир кадыр барктуу, эң таасирлүү массалык маалымат каражаттарынан болуу;


«Биринчи радио» атаандаштыкка жөндөмдүү радио.

«Биринчи Радионун» жаңылыктар кызматы ар бир сааттын башталышы жана ортосунда обого чыгып турат. Ар бир чыгарылышында окуя жүрүп жаткан жерден кабарчыларды байланышка чыга алат. Маалымат алуу булактары: министрликтер, ишкана мекемелердин басма сөз кызматтары, маалымат агенттиктери жана башкалар. Бул күнүмдүк турмуштун күрөө тамырын кармаган маалымат радиосу. «Биринчи Радионун» уктурууларынын негизги форматы: - ар бир 30 минутта жаңылыктар; - «Күндүн темасы » - Ар бир жаңы күндүн олуттуу маселелерин эксперт – адистердин катышуусунда түз эфирде талкууга алган маалымат талдоо уктуруусу.

"Биринчи радионун" жыштыктары:

1 Бишкек FM 104.1 2 Ысык-Көл FM 102.4 3 Нарын FM 100.5 4 Ош FM 100.7 5 Баткен FM 104.2 6 Жалал-Абад FM 104.7 7 Талас FM 102.0 8 Чүй FM 104.1

Кыргыз радиосу

Кыргыз радиосу мындан 80 жыл мурун, тагыраак айтканда, 1931-жылы негизделген. Ал кездеги техникалык жана чыгармачылык мүмкүнчүлүк чектелүү болгондуктан уктурууларды берүү ыкмасы азыркыдан кыйла айырмаланып, примитивдүү деңгээлде болгон.

Мезгил өтүү менен бирге радио кызматкерлеринин тажрыйбасы улам артып олтурган. Жергиликтүү кызматкерлерди ал кезде СССРдин курамындагы башка шаарларга кыска мөөнөттөгү окууларга жөнөтүп, алардын билим деңгээлин, тажрыйбасын өнүктүрүп турушкан.

Ошентип 80 жылдын ичинде Кыргыз Радиосунун техникалык жана чыгармачылык мүмкүнчүлүктөрү кеңейип, улам жаңы бийиктиктерди багынтып олтуруп, бүгүнкү күндөгү деңгээлине келип жетти.

Кыргыз Радиосунда 80 жылдын ичинде радиодо кандай гана чыгармачыл адамдар иштеген жок. Алардын көбү азыр ардагер кызматкерлер. Угарман журтуна аты-жөнү белгилүү болуп, кадыр-сыйга ээ болгон кесиптештерибиз кыйла көп. Алсак, Турсун Уралиев, Тенти Орокчиев, Курманбек Өгөбаев, Эркин Тазабеков, Аман Нааматов, Жумакадыр Эгембердиев, Жакып Медетов, Сатыбалды Абдымомунов, Мамыр Иминжанов, Бекболот Абдраимов, Саткын Абдрахманова, Диляра Пиваварова, Бегайым Жайчиева жана башкалар. Бул инсандар өздөрүнөн кийинки муундарга устат катары көп тажрыйбаларын бөлүшкөн.

Бул радио 2009-жылы июнь айында эки каналга бөлүнүп, анын бири адабий-музыкалык канал катары багыт алып, “Кыргыз радиосу” деген ат менен өзүнчө чыккан.

Кыргыз радиосунун негизги концепциясы - көркөм өнөрдүн таасири аркылуу жалпы угармандардын жан дүйнөсүн байытуу, эстетикалык тарбия берүү. Элдик рухий дөөлөттөрдү элге чагылдыруу.

Кыргыз элинин улуттук касиеттерин ар убак жар салып, жаш муундарга жеткирип туруу.

Радионун – негизги урааны - “Кыргыз радиосу – жан дүйнөнүн азыгы”. “Кыргыз радиосу – көөнөрбөс мурастар казынасы”.

Ырасында эле “Адабият – элдин сезими, элдин рухий турмушунун жемиши” (В.Белинский) же болбосо “Музыканын тили – которулбай турган тил. Ал жандын тили” (А. Ауэрбах) деп таамай айтылгандай, адабият менен музыка бүтүндөй элди тазалыкка, адамкерчиликке тарбиялай турган курал.

Кыргыз радиосу бүгүнкү күндө ушул улуу максатты аркалап келет.

Радионун негизги багыттары:

1. Улуттук адабият менен искусствонун татыктуу өкүлдөрүн угармандарга таанытуу. (“Бейне”, “Түз эфирдеги жолугушуу”, “Жарыгы калган жылдыздар”, “Инсан”, ж.б.).

2. Кыргыз адабиятындагы мыкты чыгармалардын радио вариантын иштеп чыгып (көркөм окуулар, спектаклдер, постановкалар ж.б.), угармандардын көркөм табитин калыптоо.

3. Ата-бабалардан калган көркөм мурастарыбызды, кол өнөрчүлүгүбүздү угармандарга жайылтуу. (“Кыргыз радиосунун алтын казынасынан”, “Мен кыргызмын”, ”Мурас”, “Көөнө тарых”, “Өнөркана” ж.б.).

4. Маданият тармагындагы күнүмдүк иш-чаралар, жаңылыктар менен угармандарды тааныштыруу. (“Кутман таңың менен, Кыргыз- стан”, “Маданий жаңылыктар”, “Муз-обо” ж.б.).

5. Таанытып-билдирүүчү, тарбия берүүчү багыттагы уктуруулар.

"Асыл ойлор", "Мен билген улут каадасы", "Адеп", "Унутта калган уютку", "Адистин пикири" ж.б.).

Кыргыз радиосунун негизги байлыгы – 80 жыл бою топтолуп келаткан алтын казынадагы баалуу уктуруулар. (Атактуу инсандар м-н маектер, көркөм окуулар, спектаклдер, постановкалар, музыкалык чыгармалар ж.б.). Редакция андагы уктурууларды ылайыгына жараша эфирге жайгаштырат. Ошол эле учурда баалуу, актуалдуулугун жоготпой турган, мазмундук жана көркөмдүк жактан мыкты даярдалган программалар Көркөм Кеңешке сунушталып турат. Көркөм кеңештин мүчөлөрү тарабынан талкуудан өтүп, мыкты деп табылган программалар жобого ылайык протокол түзүлүп алтын казынага кабыл алынат. Андагы кабыл алынган уктуруулар өз эрежесине ылайык көздүн карегиндей аяр сакталат. Башта уктуруулар атайын лентага (тасмага) сакталса, кийин техникалык мүмкүнчүлүктөр кеңейгенде компакт-дисктерге көчүрүлдү. Учурда программаларды эфирге даярдоо процесси жалаң компьютердик техника аркылуу ишке ашырылып келет. Мындай көрүнүш кызматкерлердин ишин бир кыйлага жеңилдетти.

Учурда Кыргыз радиосунун башкы редактору - Мирлан Самыйкожо. Музыкалык бөлүм боюнча орун басары – Жамила Маматова.

Адабият бөлүмү боюнча орун басары – Элмира Ажыканова.

Мындан тышкары редакцияда жаштар бөлүмү бар. Бөлүм жаштарга тиешелүү учур маселелерин чагылдырат. Мында негизинен жаш журналисттер жана штаттан тышкары кабарчылар иш алып барышат.

Редакцияда 18 редактор, 8 сырт кабарчы, 2 режиссер эмгектенет.

Күн сайын 17 (он жети) сааттык уктурууларды эфирге чыгарат.

Уктуруулар жалаң кыргыз тилинде даярдалат.

Программалардын сапатын жакшыртып, угармандардын катарын көбөйтүү максатында редакция жамааты ар убак талкууларды, талдоолорду өткөрүп, өз кызматын өтөп бүткөн уктурууларды жаап, жаңы долбоорлордун үстүндө изденип, эфирге даярдап келишет. Ошол эле учурда Радионун жүзүн чагылдырып турган роликтер учурга, мезгилге ылайык маал-маалы менен жаңыланып турат.

Бүгүнкүдөй саясатташкан, күнүмдүк көйгөйлөр адамдын акыл-эсин чарчатып турган кымгуут заманда угармандардын жан дүйнөсүнө азык берип, эс алууга багыттап, жакшылыкка үндөп келаткан Кыргыз Радиосунун келечеги алдыда!

Миң кыял FM

Кыргыз Коомдук Телерадиокорпорациянын 3-каналы болгон "Миң кыял FM" радиосу 2007-жылы 1-январда ачылган. Кыргыз улуттук Радиосунун 1, 2–программаларынан эфирдик классификациясы аркылуу кескин айырмаланат, тактап айтканда, “Миң-Кыял FM” 70% музыкадан, 30%ы маалыматтан турат. Радио программаларын музыкалык-маалыматтык форматтын принциптерин сактоо менен кыргыз тилинде гана даярдайт. Музыкалык саясаты боюнча Кыргызстандык гана аткаруучулардын кыргыз жана орус тилдүү чыгармаларын угармандар арасында жайылта турган алгачкы радиостанция. Ошондой эле рекламалык кызмат дагы эки тилде жүргүзүлөт. Маалымат таратууда “Миң кыял FM” радиосу “Би-Би-Си” Бүткүл дүйнөлүк маалымат кызматы менен өнөктөш экендиги менен өзгөчөлүү. Ал эми радиостанциянын өздүк жаңылыктар кызматы “5 мүнөт” деп аталат.

"Миң кыял FM" Бишкек шаары жана Чүй облусу боюнча FM 103. 7 МГ ц жыштыгында, “стерео” режиминде, жалпы көлөмү 24 саат бою иш алып барат. Мындан сырткары, радиостанция учурда Баткенде FM 102. 2 МГ ц, Ош жана Жалал Абад облустары боюнча FM 106. 3 МГ ц жыштыктарында уктурулат.

Радиостанциянын концепциясы:

- Радиоугармандардын маалыматтык, социалдык-этикалык жана маданий-эстетикалык талаптарын канааттандыруу максатында жогорку сапаттагы радиоуктурууларды даярдоо.

- Республика тургундарына ишенимдүү жана оперативдүү маалыматтарды жеткирүү.

- Өлкөнүн региондору арасында навигациялык көпүрөлөрдү түзүү.

- Угармандар менен, жана угармандар арасында диалогду тереңдетүү жана кеңейтүү.

- Коомчулукту бириктирүү каражаты катары улуттук маданиятты, саясий маданиятты өнүктүрүүгө көмөк көргөзүү.

- Кыргыз тилдүү музыкага басым коюу, ата – мекендик аткаруучуларга колдоо көрсөтүү.

"Миң-Кыял FM": Аталышы: Негизинен бул сөз айкашын чечмелеп келсек "миң" көп же чексиз деген маанини берет. Ал эми "кыял" – адамдын жан-дүйнөсүндө жашаган эң бир жарык, эң бир сонун, адамды алдыга сүрөп, турмушунда не бир жаркын үмүттөрдү пайда кылган жакшы нерсе. “Кыргыз” деген түпкүлүктүү элдин кулундары болгонубуздан кийин, албетте улуттук колоритке да ылайыктуу келет. Эң негизгиси кыргыз музыкасынын корифейи Токтогул Сатылгановдун толуп-ташып турган жаштыктын символу болгон“Миң-кыял” аттуу күүсүнүн көп кырдуу маанисине таасирленип тандалып алынган.

Балдар Fm

Кыргыз радиосу элге керектүү маалыматтарды, кабарларды жеткирип, жагымдуу маанай тартуулап келе жаткандыгына быйыл 80 жыл болду. Мына ушул аралыкта нечен деген окуяларга, тоскоолдуктарга, өзгөрүүлөргө дуушар болуп, ошол эле учурда бир топ ийгиликтерге жетишти десек жаңылбайбыз. Мисалы башында бир гана радио болуп, анда дагы саналуу саат гана эфирге чыгып турган болсо, учурда 3 жыштыкта 5 радио күнү-түнү угармандарга кызмат кылат. Мына ушул радиолордун ичинде балдарга таалим-тарбия, билим берүү багытта иш алып бараткан Кыргызстандагы жападан жалгыз «Балдар Fm» радиосу бар экендигин сыймыктануу менен айтсак болот.

«Балдар Fm» радиосунун тарыхына кыскача токтоло кетсек: Мындан 50 жыл мурда Кыргыз радиосунун адабий редакциясынын алдында “Балдар редакциясы” негизделген. Ошол мезгилде балдарга арналган ырлар, постановкалар, жомоктор даярдалып эфирге кетип турчу. Бара-бара бул редакция кеңейип, жаштарга арналаган программаларды даярдоо менен “Жаш толкун” чыгармачыл өндүрүштүк бирикмеси болуп өзгөрөт. Андан бери анын көлөмү да, форматы да, мазмуну да өзгөрүп, мезгил талабына ылайык жаныланып, жаңы уктуруулар менен толукталып келген. Ал эми бирикме өзүнүн бардык уктурууларын бир топко бириктирип, алгачкы ирет түз эфирге 1992- жылы “Жаштык” радиоканалы деген ат менен чыга баштаган. Ошол күндөн баштап 2009-жылга чейин угармандар “Жаш толкун” чыгармачыл өндүрүштүк бирикмесинин берүүлөрүн “Жаштык”радиоканалы деген аталышта кабыл алып келишкен. “Жаш толкун” бирикмесинин уктурууларынын 65 % жаштарга, ал эми 35% балдарга арналган.

Ал эми 2009-жылдан баштап балдарга арналган өзүнчө радио ачууну максат коюп, «Балдар Fm» радиосу деген долбоор менен “Биринчи радионун” жыштыгында эфирге чыгып келебиз.

Учурда «Балдар Fm» радиосунда 5 редактор, 1 режиссер ошондой эле сырт кабарчылар кызмат кылат. Ал эми эфирге «Биринчи радионун» жыштыгында ишемби , жекшемби күндөрү саат 11.00 дон 15.00 го чейин чыгабыз

«Балдар Fm» радиосунун максаты: Ар бир бала тактыктуу билим алууга жана татыктуу жашоого тийиш. Алардын көңүлүн чөгөрбөй, максатына жетүүсүнө өбөлгө түзүшүбүз керек. Ошондуктан биз «Бала жылмайса - аалам жылмаят! » деген ураан менен иш алып барабыз.

«Тарбия берүү- улуу иш; ошол аркылуу адамдын келечек тагдыры чечилет » деп педагог , ойчул Белинский айткан. Мамлекетибиздин келечеги болгон балдарды тарбиялоодо үй-бүлөнүн, мектептин эле эмес радионун дагы таасири чоң экендигин эске алуу менен уктурууларыбыздын негизин билим, тарбия берүү,таанып-билүү, маалымат-аналитикалык программалар түзөт. Ошондой эле балдардын ой чабытын өстүрүүчү оюндар дагы бар.

Айрым уктурууларга токтоло кетсек:

1. Балдардын жарандык жактан калптануусу,социялдык өнүгүшү,билим алуусу, ден соолугу жана ж.б ушул өңдүү актуалдуу проблемаларын чагылдырган аналитикалык берүүлөрү: “Коом жана балдар”, “Атайын репортаж”, “Мөл булак”; 2. Коомдогу көрүнүштөрдү, балдардын көз карашында талдоого алган радиодебат :“Балдар шаарчасы”; 3. Таанып- билүү, тарбиялык мааниси бар: “Сендей менен Мендей”, “Баарын билгим келет”, “Бал суроо”,“Мына кызык”, “Сыйкырдуу жомок”, “Уламыш”, “Балдар үчүн аңгеме”, “Салам жаш таланат”, “Жаныбарым жан досум” ж.б уктуруулар; 4. Билим берүү үчүн интелектуалдык таймаштар: “Акыл таймаш”, “Манас таануу”; 5. Ой чабытты өстүргөн, бөбөктөргө арналган: “Ая-ай белек”, “Тапкан тапалак” оюндар; 6. Көңүл ачуу форматындагы “Момпосуй” куттуктоо программасы, “бала тили бал” рубрикасы түз эфирде уктурулат.

«Балдар Fm» радиосунда уктуруулардын 70% балдар өздөрү алып барышат. Мында биз балдарды алып баруучулукка эле үйрөтпөстөн, актердук чеберчилигин дагы өстүрөбүз. Эфир алып барып жаткан балдардын кичинекей угармандар алдында жоопкерчиликти сезүү керек экендигин айтып, аларды чыгармачылык изденүүгө чакырабыз. Жөнөкөй эле мисал: кийинки уктурууларга кызыктуу маалыматтарды даярдап келүүнү талап кылабыз. Алар кызыктуу маалыматтарды топтоо менен биргеликте өздөрү дагы окуп билимин тереңдетишет.

«Балдар Fm» радиосу 2009-жылдан бери өзүнүн сүйүктүү угармандарын тапты десек жаңылбайбыз. Бизге Бишкек шаарынын кичинекей тургундары эле эмес, алыскы аймактардан дагы телефон аркылуу байланышка чыгып, кат жазышып уктуруулар боюнча өз ойлорун билдиришип турушат. Мындан сырткары оюндарга, куттуктоо программаларына дагы телефон аркылуу байланышат.

Түнкү Белес радиосу

"Түнкү Белес" радиосу - музыкалык көңүл ачуучу жана информациялык радио.

-Жалпы эфирдик көлөм: 6 саатты түзөт. -Музыкалык көңүл ачуу программалары: 3 саат, 3саат көркөм публицистика. -Музыкалык форматы:фольклор жана эстрадалык поп -Аудитория: 16 жаштан 40 жашка чейин. -Кызматкерлердин саны:10. -Жыштыгы: ФМ106,9. УКВ 66,38. -Тили:Кыргыз . -Слоганы: Баары алдыда! Эртең түндөн башталат! -Башкы редактор:Н.Исакова.

-Тарыхы: "Түнкү Белес" радиосу 2009-жылдын сентябрь айында (мурдагы 21-кылым радиосу кийинки ”Белес” радиосунун базасында түзүлгөн . Ата - Мекендик радиолордун тарыхында алгачкылардан болуп түнкү угармандарга ыңгайлашып кызмат кылып, күндүз эс алган радио азырынча жалгыз эле, ал -“Түнкү Белес”.

Радио алгач обо толкунга "Үкү шоу", "Миң бир түн", "Түнкү Сырдашуу" программалары менен чыгып, алгачкы практиканын жакшы натыйжасын көргөн.Түнкүсүн бизди такси айдоочулар, түнкү оюн- зоок жайларындагы эс алуучулары, күзөт кызматындагылар, муза чакырган искусство адамдары жана башкалар угат.

Учурда биз жаңыланып ,чапан чапкытыбызды улуттук нарк насилдин үлгүсүндө жасап алдык. “Ак Чөлмөк”, ”Нур –Мекен”, ”Бешик ыры”, “Түнкү-Кайык” “Бермет сап”, ”Ой Булбул” деген програмаларыбыз түн сайын обо толкунга чыгып, улуттук табитти калыптандыруу максатын көздөп жатат.

Биздин радионун чыгарып жаткан программаларынын 30% угармандар менен ар кандай теманын тегерегинде маектешүү түзөт.Түнгө ылайыктуу теманын тегерегинде романтикалык кыялдарга эргүү биздин радиого көрк берип ай менен сырдашкандай таасир калтырат. Мисалы: жумасына үч жолу чыгуучу “Түнкү Кайык”, “Махабат дастаны” “Ой Булбул” “Бермет сап”,программалары лирикалык ырлар жана сыр ачуу менен бирге уйку менен татуу түш тартуулоочу факторго ээ боло алат.

"Түнкү Белес" музыка жонүндо

Ар бир радио өзгөчөлөнгөндү каалашат.Биз кыргызстанда жалгыз гана таң атканча кызмат кылган радио экенибизди эске алып, түз эфирде шатыра-шатман маанай менен белгилүү бир түнкү аудиторияга кызмат кылабыз.Музыкалык форматта жагымдуу шок эң акыркы эстрада ПОП музыка, эн акыркы кыргыз музыкалык аспаптары менен жасалгаланган сапаттуу ырларды жаңыртабыз.

Радионун жыштыктары:

Бишкек Чүй: FM 106,9 жана УКВ 66,38. Ош: FM УКВ 71,69 жана 71,81. Баткен: FM УКВ 70,88.68,48. Жалал-Абад: FM 105,9.УКВ 71,93,72,20.66,86. Талас: FM 107,6.УКВ 67,82. Ысык-Кол: FM 106,0.УКВ 67,82,67,04. Нарын: FM 103,2 жана УКВ 72,08.

КТРК - лидер

Сурамжылоонун алкагында ресспонденттерге кайсы каналдын жаңылыктарын көп көрөсүз деген суроо берилген. 2011-жылдын май айынан тартып КТРКнын саясий маалыматтарына жана жаңылыктарына ишенгендердин саны 42%дан февралга карата 50%га өскөн. Ошол эле маалда Орусиянын Биринчи каналына (ОРТ) жана РТРге кыргызстандыктар көп ишенбей баратышат. Жыйынтык боюнча КТРКнын жаңылыктарын көргөндөрдүн саны 46% дан 56%га өскөн. ЭлТР каналынын көрүүчүлөрүнүн саны дээрлик өзгөргөн эмес - ал 13% дын айланасында. Ал эми 5-каналдын көрүүчүлөрүнүн саны 9%дан 5%га кыскарып кеткен. Ошондой эле, Орусиянын Биринчи каналына - ОРТга болгон ишеним да соңку бир жыл ичинде 12 пайыздан 6 пайызга төмөндөп, РТРге ишеним 3 пайыздан 2 пайызга чейин азайып кеткени айтылган. Ошондо 5-каналды, ЭлТРди жана ОРТны көрүүчүлөрдүн саны биригип дагы КТРКны көргөндөрдүн санына теңелбейт.

Кайсыл каналдын жаңылыктары жана саясий маалыматтарына ишенесиз деген суроого элдин көбү КТРК деп жооп бергенин көрсөткучтөр билдирип турат. Мисалы былтыркы майда ал 42 пайыз болсо, быйылкы февралда көрсөтүч өсуп, ал ишеним 50 пайызды тузгөн. Экинчи орунда ЭлТР каналы келе жатат. Анын маалыматтарына былтыр 19 пайыз ишеним бар болсо, 2012-жылы ал 13 пайызды түзүп турат. Ал эми 5 -каналдын маалыматтарына ишенденгер 2012-жылы 13 пайызды түзө турган болсо, быйыл ал көрсөткүч 9% жеткен. Россиялык 1- канал төртүнчү сапта. Каналдын маалыматтарын алгандар былтыр 12 пайызга барган, быйыл болсо ал 6%ды тузөт. 7-канал бешилтикке илинген. Өткөн жылга салыштырмалуу анын көруучулөру өсуп, быйыл 8% түзүп турат. НТС каналынан саясий маалыматтарды алгандар 3% тузөт. Ал эми НБТ телеканалынын жаңылыктарына ишенгендер 3 пайызга жетет. РТР каналы болсо 2 пайыз көрсөткүчү менен сегизинчи сапта. "Пирамиданыкы" да 2 пайызды түзөт. Башка булактарды пайдалангандар быйылкы февралда 3 пайыздга жеткен. Ал эми эч бир каналдын маалыматына уңүлбөгөндөр былтыр 4 пайыз болсо, быйыл ал 1% болуп калган.

Кайсы радиостанциянын саясий маалыматтарына ишеним артасыз деген суроого респонденттердин көпчүлүгү “Азаттык” радиосунун программаларын угаарын билдирген. 2011-жылдын майында "Азаттыктын" угуучулары 10- сентярбда 11 жана 2012-жылдын февраль айында 5 %га төмөндөп кеткен. Кийинки сапта "Кыргызстан обондору" радиосу. Бул радиостанциянын угуучуларынын пайыздык көрсөткүчү өзгөргөн эмес. Былтыр май, сентябрь айында жана быйылкы жылдын февралына көрсөткүч 5%ды түзгөн. Кийинки орунда "Кыргыз радиосу" былтыркы жылдын сентябрь айында 5% угуучулардын купулуна толсо, 2012-жылы бул көрсөткүч 2 пайызга төмөндөп кеткен.

Интернеттеги шилтемелер