Опол, опол-тоо

Опол, опол-тоо — топоним . Эпосто адегенде Манастын бабасы Ногойдун ордосу турган, андан кийин Ороздунун он уулу мекендеген жер катары сүрөттөлөт.

Чоң атаң аты Ногой деп,

Каратып турду Кашкарды,

Кара-Шаарга жеткенче

Кан атаң Ногой башкарды.

Санатын алган Сары-Колду,

Ага самаган душман сап болду.

Ордо кылган Ополду,

Дан-Дүн тоонун оюна

Далай журтун которду (Сагымбай Орозбаков , 1.117).

Орозду кандын он уулу

Опол-Тоо калган жерине,

Ойрон калган бай Жакып

Ногойдун келбей жерине (Сагымбай Орозбаков, 1.50).

Опол-Тоо деп илгеркилер Сарыкол менен Жаркендин ортосундагы бүткүл Түркстан аймагындагы эң бийик тоо кыркаларын атаган болуу керек. Анын азыркы наамы — Мустагата.

Колдонулган адабияттар

• "Манас" энциклопедиясы/Мамлекеттик тил жана энциклопедия борбору. Бишкек: Кыргыз энциклопедиясынын Башкы редакциясы, - 1995. 1-т. - 440 б. ISBN -5-89750-013-4