Каймак

Каймак – ынак сүттү сүт тартуучу машинада (сепаратордо) тартуу менен алынуучу сүт азыгы; сүгтөн даярдалган байыркы сүт азыгынын бири. Сүт тартуучу машина ойлоп чыгарылганга чейин Каймак алуу үчүн уйдун, койдун жана эчкинин сүтү бышырылып же чийки 12-24 саат коюлуп, үстүңкү катмары калпып алынган. Каймак жасалышы жана даамына жараша айырмаланат. Чийки сүттүн Каймагы камкаймак; бышырылган нак сүттүкү коймо Каймак; чөбөгөсү бөлүнбөй, чала сызгырылып, ага ун чалынып, сүт, бал кошулганы бал Каймак; жылуу сүттү машинада тартып алынганы тартылган Каймак; тартылган Каймакка айран кошуп, бир нече саат муздатылып, ө. ж-да чыгарылганы ачытма Каймак (сметана) деп аталат. Азыр Каймакты массалык чыгаруу атайын сүт заводдорунда жүргүзүлөт. Каймак демейде 10, 20, 35%түү майлуулукта чыгарылат. Каймактын курамында 1035% май, 3,4%тей белок, 4,2%ке жакын сүт канты, минерал заттар 0,3-0,6% болот. Тамак-аш өнөр-жайында кургак Каймак да жасалат. Каймак май, ачытма Каймак бал муздак ж. б. азыктарды алууда пайдаланылат.

Колдонулган адабияттар

• “Кыргызстан” улуттук энциклопедиясы: 3-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2011. 784 бет, илл. ISBN 978 9967-14-074 -5