Панкреатит

Wikipedia дан
Катуу кармаган панкреатит

Панкреатит (латын тилинен pancreatitis, байыркы грек тилинен πάγκρεας — карын астындагы без+ -itis — сезгенүү) — уйку безинин сезгениши.

Түрлөрү[оңдоо]

Панкреатит

  • катуу кармаган жана
  • өнөкөт болуп айырмаланат.

Катуу кармаган панкреатит[оңдоо]

Катуу кармаган панкреатит менен 30—60 жаштардагы, айрыкча аялдар ооруйт. Көбүнчө май алмашуу бузулгандарда кезигет. Панкреатитке аракечтик (Өнөкөт аракечтик), начар же өтө ашыкча тамактануу, өт жолдорунун таш оорусу түрткү берет. Уйку бездин кан тамырларынын жабыркашы (тромбофлебит), инфекция оорулары, ич көңдөйүнүн травмасы жана сезгениши панкреатитке себеп болот. Оору көп учурда майлуу, өткүр тамак жана алкоголь ичкиликтерин ичкенде ичтин жогору жагы капысынан катуу ооруп башталат.

Формалары[оңдоо]

Катуу кармаган панкреатиттин белгилери ар түрдүү болуп, жеңил формасында ич бир аз ооруйт. Ал эми катуу формасында өтө катуу ооруп, коллапс, шок абалына чейин жетет.

Белгилери[оңдоо]

Бул учурда ичтин жогору жагы курчалып катуу ооруйт, оору аркага берилет, окшуйт, кусат, ич көбөт, катат, чанда өтөт, тамакка табити тартпайт. Панкреатиттин биринчи белгиси байкалары менен медициналык тез жардам чакырып, оорулууну төшөккө жаткырып, курсактын жогору жагына муздак коюу керек. Катуу кармаган панкреатитти демейде ооруканада дарылайт.
Катуу кармаган панкреатит өз убагында дарыланбаса өнөкөт панкреатитке өтүшү мүмкүн.

Өнөкөт панкреатит[оңдоо]

Өнөкөт панкреатиттин белгилери сезгенүү процессинин чогулушуна жана стадиясына жараша ар түрдүү болот. Өнөкөт панкреатиттин диагнозун тактоодо кандагы ферментти лабораториялык изилдөө да колдонулат. Өнөкөт панкреатитти врач консервативдүү жол менен дарылайт. Май жана углеводу аз тамактануунун мааниси чоң. Керек болсо фермент берилет.

Алдын алуу[оңдоо]

Панкреатитти алдын алуу уйку безин сезгентүүчү себептерди четтетүүгө, түрткү болуучу ооруну өз убагында дарылоого негизделген.

Колдонулган адабият[оңдоо]

Кыргыз Совет Энциклопедиясынын Башкы редакциясы. «Ден - соолук» Медициналык энциклопедия. - Ф.:1991, ISBN 5-89750-008-8