Чаар-Таш мрамор кени

Чаар-Таш мрамор кени — Талас облусунда, Кендин батыш чети Кара-Буура, чыгыш чети Бакай-Ата районун аймагында, Өзгөрүш кыштагынан 10 км түндүк тарапта, Эчкилитоодо, деңиз деңгээлинен 1630–1765 м бийиктикте.

1985-ж. чалгындалган. Кен аймагын протерозойдун аягында пайда болгон карбонат-терриген чөкмө тектери түзөт. Пайдалуу мрамор катмарынын узундугу 42 км, калыңдыгы 40 м, (чыгышында 500 мге жетет). Мрамор майда бүртүкчөлүү, негизинен агыш кызгыл түстө, боз темгилдүү. Жакшы сайкалданат. Блоктордун чыгышы 11,3%–14,7%, 20–30 мм калындыктагы сайкалданган такталардын чыгышы 12,9–12,8 м²/м³. Физикалык-механикалык касиети боюнча имараттын ички жана сырткы дубалдарын кооздоп каптоого жарактуу. Ошондой эле майда күкүмүн курулушка пайдаланууга, кээ бир түрлөрүнөн кооз буюмдарды жасоого болот. Мрамордун каптама таш катары бекитилген запасы В категориясы боюнча 440 миң м³, С1–1988 миң м³ В+С1–2428 миң м³.

Колдонулган адабияттар

• Кыргызстандын кен байлыгы: Энциклопедиялык окуу куралы/Мамлекеттик тил жана энциклопедия борбору. Бишкек – 2004, ISBN 9967-14-009-7
• «Кыргызстан». Улуттук энциклопедия: 7-том / Башкы ред. Ү. А. Асанов. К 97. Б.: «Кыргыз энциклопедиясы» башкы редакциясы, 2015. - 832 б., илл. ISBN 978-9967-14-125-4