Биофизика

Wikipedia дан
Photosynthetic Reaction Center Drawing.png

Биофизика (байыр.-грек. βίος — жашоо, байыр.-грек. φύσις — жаратылыш):(биологиялык физика) — бүтүндөй организмде, анын айрым органында, ткандарында жана клеткаларындагы физикалык касиеттер менен кубулуштарды, ошондой эле тиричилик процессинин физикалык-химиялык негизин изилдөөчү илим.

Изилдөөчү багыты[оңдоо]

Тирүү организмдердин составына кирүүчү татаал химиялык бирикмелерди, анын ичинде белокторду жана нуклеин кислоталарын, ошондой эле алардын өз ара таасирлерин молекулалык биофизика изилдейт. Клетка биофизикасы клетканын аткарган кызматынын физикалык-химиялык негизин, клетка структурасы менен функциясынын байланышын, механикалык жана электр касиеттерин, ошондой эле клеткада жүрүүчү процесстердин энергиясын жана термодинамикасын жана башка изилдөөгө багытталган. Ал термодинамика жана биологиялык кинетиканын маселелерин иштеп чыгат. Биологиялык мембрананын структурасын жана функциясын изилдөө — биофизиканын башкы маселелеринин бири.

Организм клеткасында физикалык энергиянын химиялык энергияга айлануу, башкача айтканда жарыктын таасири менен жашыл өсүмдүктө жүрүүчү фотосинтезде органикалык бирикмелердин пайда болуу механизмин үйрөнүү чоң жетишкендиктерге ээ болду. Тирүү организмге иондоштуруучу нурлануу (радиациялык биофизика) таасир эткендеги энергиянын айлануусу изилденүүдө.

Биофизика медицинада[оңдоо]

Биофизика медицина менен тыгыз байланыштуу. Ал ар кандай патологиялык процесстердин пайда болуу жана өтүү механизминин физикалык-химиялык өзгөчөлүгүн изилдейт. Атап айтканда биофизика сезгенүү, ак шишик, нефрит, туз-суу тең салмактуулугун жөнгө салуу механизми жөнүндө теориялык түшүнүк берди. Нурга чалдыгуунун механизмин түшүнүүдө, бул жабыркоону алдын алуу жана дарылоонун негизин иштеп чыгууда биофизиканын ролу чоң. Зыяндуу шишиктин физикалык-химиялык жана молекулалык механизми, өөрчүү өзгөчөлүгү, көпчүлүк дары заттардын таасир этишинин физикалык-химиялык механизми жана башка биофизиканын методдору менен изилденет.

Колдонулган адабияттар[оңдоо]

Кыргыз Совет Энциклопедиясынын Башкы редакциясы. «Ден соолук» Медициналык энциклопедия. - Ф.:1991, ISBN 5-89750-008-8