Домье, Оноре Викторьен

Домье, Оноре Викторьен (1808–1879) – француз графиги. Революциядан (1830) кийин саясый карикатуранын чебери катары белгилүү. Литографиялык портрет-шарждарында, ксилографиялык чыгармаларында Д. жумушчулар менен революциячылардын образын жаратып, буржуазиялык ак сөөктөрдүн реакциясын аёосуз ашкерелеген (“Закон уюткусу”, “Басма сөз эркиндиги”, “Транснонен көчөсү...”, 1834). Д-нин алгачкы литографиялык чыгармалары саясый жыйынтыгынын таамайлыгы, терең мазмуну менен көңүлдү бурган. Саясый карикатурага тыюу салынгандан кийин (1835) Д. турмуш сатирасында иштеп, дүнүйөкор, дөгүрсүгөн соттор менен чиновниктерди, буржуйларды сынга алган [“Карикатюран”, (1836–38); “Мыйзамчылар”, (1834); “Адал буржуалар”, (1846–49), литография сериялары]. Д. 1848 жана 60–70-жылдардагы революция тушунда саясый сатирага кайрадан кайрылган. Д-нин чыгармаларында карапайым адамдардын образы да кеңири орун алган. Прогрессчил искусствого зор салым кошкон XIX кылымдагы сынчыл реализмдин өкүлү. Д-нин чыгармачылыгы пролетардык азатчыл козголоң менен тыгыз байланыштуу.

Колдонулган адабияттар

• Кыргыз сүрөт искусствосу: Энциклопедиялык окуу куралы/Мамлекеттик тил жана энциклопедия борбору. -Б.:, 2004