Британ энциклопедиясы
«Британ энциклопедиясы» (лат. Encyclopædia Britannica), же «Британника» (лат. Britannica) — бул дүйнөдөгү эң эски, универсалдуу энциклопедиялардын бири. Анын 3 томдуу 1басылышы 1768–71-ж. Эдинбургда, кийин Лондондо чыккан. Британ энциклопедиясынын 9- (1875–89; 25 том) жана 11- (1910–11; 29 том) басылыштары бир кыйла дурус чыккан. Акыркы 24 томдуу 14-басылышы 1929-ж. башталган. Мындагы макалалардын көпчүлүгү кеңири обзор түрүндө жазылган. 20-кылымдын башында бул энциклопедияны чыгарууда англиялык жана америкалык авторлор биргелешип иштегендиктен, мазмуну боюнча британ-америкалык энциклопедияга айланган. 40-жылдардын башталышынан «Британ энциклопедиясы» Чикагодо У. Бентондун жетекчилиги менен чыгарылган. 1968-ж. «Британ энциклопедиясынын» 200 жылдык юбилейине карата илимдин ар кандай тармактарын камтыган көлөмдүү макалалардан турган 3 томдук басылган. 1969-ж. басма сөздө «Британ энциклопедиясынын» жаңы басылышын даярдоо жөнүндө билдирүүлөр жарыяланган. 1974-ж. 30 томдуу 15-басылышы чыгарылган. Бул басылмадан тармактык энциклопедиялар, сөздүктөр, балдар жана өспүрүмдөр үчүн (мисалы, «Комитон») да энциклопедиялар жарык көргөн.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4