Керкира
Керкира – Грекиядагы шаар. Керкира номунун (административдик-аймактык бирдик) административдик борбору. Керкира (Корфу) аралында жайгашкан. Калкы 25,6 миң (2008). Иония деңизиндеги порт. Эл аралык аэропорту бар.
Б. з. ч. 4-кылымда негизделген. 19-кылымдын неоклассикалык архитектура комплекстери жана айырмаланат. Шаардын борбордук бөлүгүндөгү орто кылымдын курулуштары Бүткүл дүйнөлүк мурастын тизмесине киргизилген. Шаар ландшафтынын эки доминантасына Эски (Пале-Фьорио) жана Жаңы (Нео-Фьорио) венециялык чептер кызмат кылат. Эски чепте (1550—59; учурда музей) Ыйык Георгий чиркөөсү ж. б. жайгашса, жаңысында туризм өнүгүп, Грекиянын Аскер-деңиз флоту жайгашкан. Керкиранын башкы аянтында Ыйык Михаил жана Георгий ак сарайлары (1819–24), муз. павильон, монумент, чиркөөлөр, Агиа-Керкира базиликасынын урандылары ж. б. бар. Шаардын экономикасынын негизин турист бизнеси түзөт. Тамак-аш (сүт, эт, майсыр; кинкандан ликёр даярдалат), текстиль өнөр-жай ишканалары жана самын кайнатуучу завод иштейт. Деңизден балык кармалат. Иония унти (1824, Иония академиясы; 1985-жылдан азыркыдай аталат), музейлер (анын ичинде археологиялык, карапа, банкнот ж. б.), искусство галереясы, театрлар бар. Фестивалдар жана жыл сайын карнавалдар (17-кылымдан) өткөрүлүп турат. Аквапарк курулган. Шаардан түштүктө Артемида дорий (б. з. ч. 6-кылымдын башы) жана Гера храмдарынын урандылары (б. з. ч. 4-кылым) ж. б. сакталган. Керкирадан батышта маанилүү курорт борбору Палеокастрица жайгашкан.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9