Вертов Дзига

Вертов Дзига, Денис Аркадьевич - (чын аты жөнү Давид Абелевич Кауфман, 21. 12. 1895 (2.1.1896), Белосток 12. 2. 1954, Москва) кинорежиссёр, даректүү киного негиз салгандардан. Граждандык согуштун материалдары боюнча «Революциянын жылдыгы» (1919), «ВЦИК үгүт поезди» (1921), «Граждандык согуштун тарыхы» (1922) фильмдерин жараткан. Вертов негиздеген «Киноправда» тематикалык даректүү киножурнал 1922-25-ж. чыгып турган. Вертовдун негизги даректүү фильмдери: «Кадам шилте, Совет!» (1926), «Дүйнөнүн алтынчы бөлүгү» (1926), «Энтузиазм» (1930), «Ленин тууралуу үч ыр» (1934) ж. б. Ал даректүү кинонун теориялык маселелерин да иштеп чыккан.

Колдонулган адабияттар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4