Виргиния-Бич
Виргиния-Бич – АКШнын чыгышындагы шаар. Виргиния штатында. Норфолк Виргиния-Бич агломерациясынын борборлорунун бири. Калкы 453,9 миң (2006; агломерациясында 1,6 млн). Атлантика океанындагы Чесапик булуңунун жээгинде жайгашкан. Норфолк ш. Виргиния-Бичке чыгышынан жалгашат. Чесапик булуңу аркылуу тешкен тоо-көпүрө автомобиль жолу (узундугу 37 км) өтөт. 1607-ж. негизделген; 1906-жылдан шаар, 1963-жылдан көз карандысыз шаар (бир да округга кирбейт). Туризм борбору, деңиз климаттык курорт; дүйнөдөгү эң узун курорт пляжы бар үчүн Гиннесс китебине кирген. «Форт-Стори» жөө аскерлер базасы, Генри тумшугунда маяк, континенттеги кыштан салынган эң эски имарат (Адам Торогуддун үйү; 17-кылымдын аягы), деңиз паркы бар. Университет (менчик), коллеж, деңиз музейи, симфониялык оркестр иштейт. Тейлөө чөйрөсүндө шаар калкынын 97% эмгектенет. Виргиния-Бичте жана анын чет жакасында авиабаза, деңиз пехотасынын базасы, аскер флотунун окуу-машыгуу борбору жайгашкан. Христиан телекөрсөтүү тармагынын штаб-квартирасы жана анын негизги студиялары (программасы 70 тилде жүргүзүлөт) бар. Машина куруу, электроника, курулуш индустрия өнөр-жай ишканалары иштейт.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055-4