Вируска каршы дарылар

Wikipedia дан
Спид каршы дарылар.

Вируска каршы дарылар. Аларга биологиялык препараттар — гамма-глобулин, интерферон, ошондой эле айрым химиялык каражаттар кирет.

Гамма-глобулин — кан сары суусундагы белок фракцияларынын бири: гамма-глобулин препараттарында микроорганизмдерди — оору козгогучтарды жок кылуучу антитело болот. Ал донордун тигил же бул инфекцияга каршы эмделген канынан, вакциналанган малдын канынан жана башка алынат. Гамма-глобулин препараттары грипп, Боткин оорусу, кызылча, энцефалит, кутурма жана башка вирустук ооруларды, ошондой эле бактериялар козгогон стафилококк инфекциясы, көк жөтөл жана башка ооруларды дарылоодо жана алдын алууда колдонулат. Гамма-глобулин, ошондой эле организмдин ооруга каршы жалпы туруктуулугун жогорулатат. Ал кээде аллергиялык реакция пайда кылышы мүмкүн, ошондуктан врачтын уруксаты менен куюлат.

Лейкоциттик интерферон — организмге кирген вируска жооп иретинде организм клеткалары иштеп чыгарган коргогуч белок. Ал айрым вирус ооруларын дарылоо жана алдын алуу үчүн колдонулат. Сасык тумоону алдын алуу максатында мурунга күнүнө 2 жолу (өзгөчө 3 айга чейинки балдарга) тамчылатат. Химиялык препараттар да (ремантадин жана оксолин) вируска каршы таасир этишет. Ремантадин чоң кишилер грипп башталганда дарылоо жана алдын алуу үчүн колдонулат; оксииндин 0,25%түү майы гриппти алдын алуу үчүн мурунга сыйпайт.

Колдонулган адабияттар[оңдоо | булагын оңдоо]

  • Кыргыз Совет Энциклопедиясынын Башкы редакциясы. «Ден соолук» Медициналык энциклопедия. - Ф.:1991, ISBN 5-89750-008-8