Вискозa буласы

Вискозa буласы – табигый целлюлозаны химиялык жол менен иштетүүдөн алынган жасалма була. Аны даярдоо төмөнкү этаптардан турат: вискоза эритмесин даярдоо, формага келтирүү жана кургатуу. Ал колдонулушуна жараша текстиль жиби, корд, штапель булалары түрүндө чыгарылат. Көпчүлүк органикалык эриткичтердин таасирине туруктуу. Аны алуу арзан жана андан даярдалган кездемелер түрдүү түскө жакшы боёлот, жакшы гигиеналык сапатка ээ. Бирок суу кезинде тез бырышат, сүрүлүүгө чыдамсыз келет. Ошондуктан, аны модификациялоо менен бышыктыгы жогорулатылат. Жибек, штапель жана кебез же жүн кездемелерге кошулат; тор жана абдан бышык техникалык буюмдарды жасоодо колдонулат.

Колдонулган адабияттар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4