Иван Бабушкин
Бабушкин Иван Васильевич (3. 1. 1873-18. 1. 1906) - профессионал революционер, большевик, социал-демократиялык партиянын көрүнүктүү ишмери.
Вологда губерниясында кедей дыйкан үй-бүлөсүндө туулган. 1887-91-ж. Кронштадт портунда, Петербургдагы Семянников заводунда слесарь. 1894-ж. В. И. Ленин баштаган маркстик жумушчу кружогуна, 1895-ж. Петербургдагы "Жумушчу табын эркиндикке чыгаруу үчүн күрөш союзунун" ишине, "Искра" (1900) газетасын уюштурууга активдүү катышкан. 1898-ж. РСДРПнин Екатеринослав комитетин, 1900-ж. жашырын чыгуучу "Южный рабочий" газетасын уюштурган. 1900-01-ж. ар түрдүү шаарларда революциячыл иштерди жүргүзгөн. Бир нече жолу камакка алынып, сүргүнгө айдалган.
1905- 07-ж. революциянын активдүү катышуучусу болгон. РСДРПнин Иркутск жана Чита комитеттеринин мүчөсү. 1906-жылдын январында өзүнүн жолдоштору менен Читадан курал-жарак алып келе жатканда, Мысовая станциясында падыша өкмөтүнүн жазалоочу экспедициясынын колуна түшүп, сотсуз жана тергөөсүз эле атылган. В. И. Ленин аны элдик баатыр, большевиктик партиянын сыймыгы деп атаган.
Колдонулган адабияттар
[түзөтүү | булагын түзөтүү]Кыргыз Совет Энциклопедиясы. Башкы редактор А. Табалдиев. -Фрунзе: Кыргыз Совет Энциклопедиясынын башкы редакциясы, 1976. Том 1. А - Бюулук -608 б.