Магниттениш

Магниттениш – макроскоптук нерселердин магнит абалынын мүнөздөмөсү. Магниттениш жөндөмдүүлүгү бар заттар магнетиктер деп аталат. Магнит талаасында ар түрдүү заттар магниттелүү менен магнит талаасынын булагы болуп калышат. Бир тектүү магниттенген телонун магниттениши J=M/V. Эгер бир тектүү эмес магниттенсе, магниттениш телонун ар бир чекити үчүн өзүнчө аныкталат: J=dM/dV, dM–dV – көлөмүнүн магнит моменти. Эл аралык бирдиктер системасында (СИде) – 1 A/м, башкача айтканда 1 м³ көлөмдөгү зат 1 A м² магнит моментине ээ. СГСде – эрг/(Гс·см³). Нерсенин магниттениши сырткы талаанын чыңалышынан (Н), ал нерсенин магниттик касиетинен, өлчөмүнөн, температурадан көз каранды. Заттын талаасынын чыңалышы Н_З менен талаанын чыңалышынын ортосундагы катыш төмөнкүчө жазылат: Н_З =Н–NJ. N – магнитсиздендирүүчү фактор. Изотроптук заттарда Jнын багыты магнит талаасынын чыңалышынын багыты менен дал келет жана анизотроптук чөйрөлөрдө багыттары боюнча ар башка болот.

Колдонулган адабияттар

• “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7