Машина куруу
Машина куруу – автомобиль, курал-жарак, аспап, керектөө заттары менен коргонууга ылайыкталган продукция түрүнүн дээрлик бардыгын чыгарган оор өнөр жай тармагы; кайра өндүрүү өнөр жайынын негизги тармактарынын бири. Бул тармак ИТПнин жана өлкөнүн коргонуу деңгээлин, башка тармактарынын өнүгүшүн чагылдырат. Учурдагы машина куруу өндүрүштүн өтө татаалдашкан жана тарамдалган (дифференциациаланган) тармагын камтыйт. Чыгарган продукциянын ассортименти, өндүрүштү жайгаштыруу өзгөчөлүктөрү жана технологиялык процесстери боюнча жалпы (экономиканын бардык тармактары үчүн өндүрүш каражаттарын чыгарууга адистешкен), транспорттук, электрондук (электр-техника менен), аспап куруу, энергетикалык курал жана аскер техникасы ж. б. машина куруу тармактарына бөлүнөт. Машина куруу ишканалары толук циклдүү жана чогултуучу заводдор болуп айырмаланат. Ошондой эле машина куруу ишканалары техникалык-экономикалык өзгөчөлүктөрү боюнча металл сыйымдуу, эмгек сыйымдуу, илим сыйымдуу ж. б. да болуп бөлүнөт. Алар өз кезегинде оор машина куруу (темир жол транспорту, кеме куруу, авиация ж. б.), жалпы машина куруу орто машина куруу (автомобиль куруу, станок жасоо ж. б.), так машина куруу (аспап куроо, радиотехника, электр-техникалык өндүрүш ж. б.), металл буюмдарын жасоо жана даярдоо (зым, мык ж. б.), машиналарды жана каражаттарды оңдоо болуп бөлүнөт. Дүйнөдө машина куруу боюнча алдынкы өлкөлөргө АКШ, Германия, Япония, Кытай, Корея ж. б. кирет да, тармактын ири компаниялары – General Electric, General Motors, Toyota Motor Соrporation ж. б.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7