Невралгия

Wikipedia дан

Невралгия (байыркы грек тилинен νεῦρον — «тарамыш, нерв» + ἄλγος — «оору») — дененин бир бөлүгүнүн сыздап катуу оорушу.

Себептери[оңдоо]

Ага нервдин, нерв түйүндөрүнүн оорусу, омуртканын же нервге жакын жайгашкан ткандар менен органдардын жабыркашы, травма, жугуштуу оорулар ( грипп жана башкалар), үшүп калуу себеп болот. Үч ача желке жана кабырга арасындагы нервдин невралгиясы көп кездешет. Үч ача нервдин невралгиясы айрым оорулардын кабылдоосу же өз алдынча оору катары жолугат. Ал кээде тиш чыгып жатканда, тишти жулганда түбү калып калып сезгенгенде, ичке каналчалар жана тешикчелерден өткөн нерв тамырчаларын сөөк өсүп кыскандан пайда болот. Кулак, мурун көңдөйчөлөрүнө суук тийип, ириңдешинде, тиш, көз сезгенгенде да невралгия болот.

Оорунун жүрүшү[оңдоо]

Оору капысынан башталып, бир нече минутадан бир нече саатка созулат. Оору башталар алдында беттин бир жери кычышып, кумурска жөргөлөп жүргөндөй сезилет, акырындап чыдатпай катуу ооруйт. Невралгия бир аз эле суукка урунса, оозду ачса, тамак чайнаса, жөтөлсө жана башкаларда кайталап кармашы мүмкүн. Желке невралгиясы көбүнчө моюн-омурткасына суук тийүүдөн, желке бир нерсеге урунуудан болот. Кабырга арасындагы невралгия аз кездешет, бирок аны жүрөк, өпкө, плевранын оорусунан айырмалоо зарыл. Невралгия курчалма лишай оорусунун (Учук) алгачкы белгилерине да окшоп кетет. Ошондуктан кабырганын арасы ооруса врачка кайрылуу керек. Дарылоону врач гана жүргүзүүгө тийиш. Невралгиянын алдын алуу үчүн денени чыңдоо маанилүү.

Колдонулган адабият[оңдоо]

Кыргыз Совет Энциклопедиясынын Башкы редакциясы. «Ден - соолук» Медициналык энциклопедия. - Ф.:1991, ISBN 5-89750-008-8