Орус православие чиркөөсү

Орус православие чиркөөсү – православие чиркөөлөрүнүн эң ириси жана таасирдүүсү. 10-кылымда негизделип, 11-кылымда Киев митрополити башында турган. 15-кылымдын ортосуна чейин Констонтинополь патриархынын көзөмөлүндө, 1447жылдан өз алдынча, 1589-жылдан патриархалдык чиркөө. 1590-жылдан Москва патриархы Константинополь собору тарабынан таанылып, православие чиркөөлөрүнүн саны боюнча 5-орунда турган. 1721-ж. Россия империясында Орус православие чиркөөсү мамлекеттик статуска ээ болуп, Синод башкарган. Азыркы учурда Москва патриархатындагы Синоддун курамында 5 туруктуу, 6 убактылуу епархиялык архиереясы бар. Епархиялык архиереяны (епископтор, архиепископтор, митрополиттер) епархиялык кеңеш башкарат. Москва православие чиркөөсүнө өз ички иштерин өздөрү башкарган Украина, Беларус, Молдовавия, Латвия, Эстония православие чиркөөлөрү кирет.

Колдонулган адабияттар

• “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111-7