Тукумдуулук
Тукумдуулук жаныбарларда жаныбарлардын эволюцияда калыптанган ар бир түрүнүн өзүнө таандык төл берип, нормалдуу шартта табигый өлүм-житимди толуктоо жөндөмдүүлүгү.
Тукумдуулук жашоо узактыгына байланыштуу жана ар кандай түрдүн көбөйүү тибине жараша айырмаланат. Узакка жашоочу жаныбар көбүнчө жыл аттатып тууп, 1-2 гана тукум берет. Аз жашоочу жаныбар (майда кемирүүчүлөр) жылына бир нече жолу 10-15тен төлдөйт. Тукумдуулук жашка, мезгилге жана азыктанууга, климат шартына жараша өзгөрүп турат.
Ар кандай түргө таандык Тукумдуулук касиети малда да болот. Мис., уй, жылкы жалкы тууйт, өтө сейрек эгиздейт; чочко породасына жараша 6-12, кээде 17-20, айрым учурда З0дан торопой, кой-эчки 1-2, роман кою 2-3 козу тууйт. Малды багуу шартын, азыктандырууну жакшыртып, түрдүү ылаңды алдын алуу, илим менен тажрыйбанын жетишкендиктерин кеңири пайдалануу жана асылдандыруу ишин өркүндөтүү аркылуу Тукумдуулуктун саны менен сапатын арттырууга болот.
Колдонулган адабияттар
[түзөтүү | булагын түзөтүү]- «Кыргызстан». Улуттук энциклопедия: 7-том / Башкы ред. Ү. А. Асанов. К 97. Б.: «Кыргыз энциклопедиясы» башкы редакциясы, 2015. - 832 б., илл. ISBN 978-9967-14-125-4