Адам-ата жана Обо-эне
Адам-ата жана Обо-эне — диний түшүнүк боюнча Кудай жараткан эң алгачкы пенделер, адамзаттын атасы жана энеси[1].
Ыйык китеп боюнча Кудай адегенде күн менен түндү, ай-ааламды, жерди, өсүмдүктөр менен жаныбарлар дүйнөсүн жараткан [2]. Андан соң, топурактан адамды жаратып, анын таноосуна дем үйлөп, жан киргизип, ага бүт жаратылгандардын үстүнөн бийлик кылууну тапшырат [3]. Адам-атага шерик болсун деп, Кудай аны уктатып коюп, кабыргасынан Обо-энени жаратат[4].
Адам-ата менен Обо-эне бейиште жашап жүрүшкөндө, жылан кейпиндеги шайтан аларды Кудай тыюу салган мөмөдөн жегенге азгырат[5]. Алар мөмөдөн жегенде, Кудайдын каарына калып, бейиштен куулушат [6][7]. Ошондон баштап, алар эмгек менен күн көрүп, жер бетинде жашай башташат[8].
Адам-ата менен Обо-энеден бир нече бала төрөлгөн, алардын ичинен эң белгилүүлөрү — Кабыл, Абел жана Шет. Бир ирет, Кудай алардын эмгегинен тартуу алып келүүнү суранат. Абел малчылык кылып, Кудайга мал курмандыкка чалат, ал эми Кабыл дыйканчылык менен алек болуп, жер-жемиштен алып келет. Кудай Абелдин тартуусун кабыл алганда, Кабылдын ичи тарыйт да, аны өлтүрүп коёт[9]. Андан соң, Адам ата менен Обо энеден Шет аттуу уул төрөлөт. Шет алардын үчүнчү уулу болуп[10], анын тукумунан Нух пайгамбар тарайт[11].
Булактар
[түзөтүү | булагын түзөтүү]- ↑ Мамлекеттик тил жана энциклопедия борбору. Педагогика (энциклопедиялык окуу куралы). - Б.: 2004
- ↑ Муса пайгамбар. Башталыш 1:1-25.
- ↑ Муса пайгамбар. Башталыш 2:7.
- ↑ Муса пайгамбар. Башталыш 2:21-22.
- ↑ Муса пайгамбар. Башталыш 3:1-6.
- ↑ Муса пайгамбар. Башталыш 3:23-24.
- ↑ Мухаммед пайгамбар. Аль-Араф сүрөө 19-25
- ↑ Муса пайгамбар. Башталыш 3:17-19.
- ↑ Муса пайгамбар. Башталыш 4:2-8.
- ↑ Муса пайгамбар. Башталыш 4:25-26.
- ↑ Муса пайгамбар. Башталыш 5:3-32.