Висла

Висла.

Висла – Польшадагы эң узун жана суусу мол дарыя. Узундугу 1047 км, алабынын аянты 198,5 миң км². Батыш Карпат тоолорунан башталат да Мазовия-Подляск түздүгү аркылуу агып, Балтика деңизиндеги Гдан бухтасы менен Висла булуңуна куярда дельтаны пайда кылат. Негизги куймалары: Сан, Дунаец, Вислока, Вепш, Буг (оң), Пилица, Брда (сол). Орточо чыгымы Варшава ш. тушта 590 м³/сек, чатында 1030 м³/сек. Жазында суусу кирет. Төмөнкү жана ортоңку агымында кеме жүрөт. Каналдар аркылуу Днепр, Одер, Неман дарыяларына туташат. Боюнда Краков, Варшава, Плоцк, Торунь, дельтасында Гданьск шаарлары жайгашкан.

Колдонулган адабияттар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4