Ганновер
Ганновер - (Hannover) Германиянын түндүгүндөгү шаар. Төмөнкү Саксония жеринин (административдик аймактык бирдик) административдик борбору (1946-жылдан) жана ири шаары. Калкы 514,0 миң (2006; агломерациясында 1,1 млн). Тогуз жолдун тоому. Ганновер аркылуу Москва Варшава Берлин Кёльн Париж трансъевропа темир жол магистралы, Бремен, Франкфурт-на-Майне жана Рур индустрия аймагындагы шаарларга автострада жана Ганновер-Вюрцбург жогорку ылдамдыктагы темир жолу өтөт. Лайн дарыясындагыжана Орто Герман каналындагы порт. Эл-аралык аэропорту бар. Машина куруу (транспорттук, айылчарба, электр-техникалык), түстүү металлургия, резина, тамак-аш, жеңил өнөр жай ишканалары иштейт. Меторополитен. Университет , институттар, музыка жана театр академиясы, опера театры, Кестнер жана Төмөнкү Саксония жеринин музейлери бар. Ганноверде жыл сайын өнөр жай ярмаркасы өткөрүлүп турат. 12-кылымдынбашынан белгилүү. 1241-жылдан шаар. Герцогдордун, курфюрсттердин (1692-жылдан), Ганновер королдорунун (1815-жылдан 1866-ж. чейин) резиденциясы. Чиркөөлөрү (14-к.), эски ратуша (1438жана 1454-55-ж. чамасы) сакталган. Шаардын аймагында Айленриде ири токой массиви, «Чоң бакча» (1666) жасалма көлү уюштурулган. Ганноверге жакын нефть жана калий тузу казылып алынат. Шаардын жаңы бөлүгүндөгү чиркөөгө белгилүү философ Г. В. Лейбництин сөөгү коюлган.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4