Жалал-Абад курорту

Жалал-Абад курорту.

Жалал-Абад курорту — бальнеологиялык, дары-баткак жана климаттык курорт.

Жайгашуусу

Курорт Жалал-Абад шаарынан 5 км чыгышта, Көгарт өрөөнүндөгү Айыптоонун батыш капталында, деңиз деңгээлинен 975 м бийиктикте жайгашкан. Бишкек шаарынан 565 км аралыкта. Аба, темир жол жана автоунаа жолу аркылуу жетүүгө болот. Аймакта арча, мисте, кара жыгач, туя, ак акация жана башка дарактар отургузулган.

Тарыхы

Жалал-Абад аймагындагы минералдуу булактар жергиликтүү элге 10-кылымдан бери белгилүү. Суунун биринчи химиялык анализи 1877-жылы жүргүзүлгөн. Ошол жылы аскердик медициналык инспектордун демилгеси менен ванна жана лазарет курулган.

• 1900-жылы курорт курула баштаган.
• 1912-жылы жергиликтүү бай Мурзакул Айыпбулакка имарат салган.
• 1918-жылы курорт Советтик эл комиссариатынын карамагына өтүп, элдик курорт макамы берилген.
• 1926–1935-жылдары 150 орундуу үйлөр жана №1 корпус курулган.
• Экинчи дүйнөлүк согуш учурунда аскердик госпиталь катары колдонулган.
• 1954–1968-жылдары негизги дарылоо жайлары курулган.
• 1972-жылы Бүткүл союздук курорт макамы берилген.
• 1984-жылы жаңы дарылоо корпустары жана мейманкана комплекси пайдаланууга берилген.

Климаты

Кышы жумшак болуп, жылына орточо 80 күн кар жаайт жана январдын орточо температурасы 2°С түзөт. Жазы эрте келип, кар марттын экинчи жарымында кетет. Жайы ысык жана кургак, июлдун орточо температурасы 27°С. Жылдык жаан-чачын болжол менен 500 мм болуп, негизинен күз жана кыш мезгилинде жаайт. Салыштырмалуу нымдуулук орточо 52% түзөт, ал эми күн тийүү узактыгы жылына 2787 саатты түзөт.

Минералдуу булактар

Курорт аймагында жети булак бар:

• №1 “Кызбулак” — температурасы 44°С, туздуу (1 л сууда 3 г туз).
• №5 “Айыпбулак” — газдуу, температурасы 41°С.
• №4 “Акбулак” — температурасы 21°С, негизинен жайкысын суу муздатуу үчүн колдонулат.
• №27 булак — ичүүчү суу, бөтөлкөгө куюлуп сатылат.

Суунун курамы

Аз минералдашкан, азоттуу, хлорид-гидрокарбонат-сульфаттуу, магний-кальций-натрийлүү. Кремний кислотасы көп (30–35 мг/л). Микроэлементтерге бай.

Баткак

Курорттогу дары-баткак талаасы 2 га аянтты ээлейт, тереңдиги 12 м. Курамы боюнча дүйнөдө сейрек кездешет.

Дарылоо ыкмалары

• Минералдуу суу менен ванна жана душ.
• Баткак аппликациялары.
• Дарылоо бассейни.
• Дарылоо-диагностика кабинети жана лабораториялар.
• Дарылоо физкультурасы, укалоо, климаттык терапия, мүнөздөлгөн тамактануу.

Дарылануучу оорулар

• Муун оорулары
• Нерв системасынын оорулары
• Карын, боор, өт баштыкчасынын сезгениши
• Тери жана бөйрөк оорулары
• Гинекологиялык оорулар

Шилтемелер

• Курорт Киргизии Джалал-Абад
• Жалал-Абад курорту