Жижка Ян
Жижка Ян (1360-ж. ченде – 11. 10. 1424) – чех элинин улуттук баатыры. 1410-жылдагы Грюнвальд салгылашына катышкан жана табор түзүлгөндөн кийин Жижка төрт гетмандын бири болгон. Прага үчүн болгон салгылашта жеңишке жетүүдө зор роль ойногон (1420-ж. 14-июль). Виткова тоосундагы коргонууну билгичтик менен башкарган (1950-ж. бул жерде Жижканын эстелиги коюлган). 1420-ж. декабрдан Жижка таборчулардын 1-гетманы. Гусчулар (1422) оң жана сол тарапка бөлүнгөндөн кийин Жижка таборчулардын сол тарабын башкарган. 1423-ж. Жижка түндүк-чыгыш Чехияда борбору Градец-Кралове болгон солчул гусчулардын «Оребит боордоштугу» деген уюмун түзгөн. Ж. өлгөндөн кийин бул уюмдун мүчөлөрү өзүлөрүн «жетимдер» деп аташкан. Жижка сапаты жана темирдей тартиби жагынан айырмаланган аскер уюштурган. Аскер жол-жобосун иштеп чыккан, жөө жана атчан аскердин түрлөрү менен катар замбирекчи аскерлерди түзгөн. Жижканын стратегиясы талаа салгылашында душманга чечкиндүү сокку урууга багытталган. Бул рыцардык аскерди жеңүүгө шарт түзгөн.
Колдонулган адабияттар
[түзөтүү | булагын түзөтүү]“Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1