Макешов, Кабыл Асангелди уулу

Wikipedia дан
Jump to navigation Jump to search

Кабыл Асангелдиевич Макешов (Кабыл Макеш) - кыргызстандык белгилүү спорттук баяндамачы, журналист.

Кыскача өмүр таржымакалы[оңдоо | булагын оңдоо]

Кабыл Макешов Асангелди уулу (Кабыл Макеш) 1961-жылы 10-сентябрда Кыргызстанда Нарын облусуна караштуу Нарын районунун Он-Арча кыштагында - Эчки-Башы айылында туулган.

Чоң атасы Макеш - кыргыз, чоң энеси казак болгон.

Оболу сегиз классты айылдагы мектепте окуган.

Нарын шаарындагы Токтогул Сатылганов атындагы орто мектепте окуп жүргөндөн баштап облустук, республикалык гезиттерге макала жазып, штаттан сырткаркы кабарчы катары таанылган.

1979-жылы эмгек жолун Нарын облусттук «Нарын правдасы» гезитинде баштаган.

1981-жылы Кыргыз Улуттук университетинин журналистика бөлүмүнө кабыл алынып, аны 1986-жылы бүтүп, Кыргызтелерадио комитетинин балдар жана жаштар редакциясында редактор болуп иштеген.

Ушул телерадиокомитетте улук редактор жана спорт бөлүмүнүн башчысы болуп беш жыл эмгектенген.

1991-жылы Кыргыз мамлекеттик дене тарбия жана спорт комитетинин республикалык методикалык кабинетинин директорунун орун басары болгон.

1992-жылы «Байге» спорттук гезитин уюштуруп, башкы редактор болуп иштеген.

1993-жылдан 1995-жылга чейин Бишкектеги «Семетей» балдар футбол клубунун президенти болгон.

1994-жылдан 2014-жылга чейин «Азаттык» үналгысынын жана «Аалам» гезитинин кабарчысы болуп 20 жыл иштеген. 2014-2016-жылдары Би-Би-Си радиосунун кыргыз кызматында штаттан сырткары кабарчы катары кызматташып, Лондон, Рио-де-Жанейро, Сочи олимпиадалык оюндарын жеринен чагылдырып турган.

«Замандаш» журналында, "Барометр" гезитинде, "Кабар-Ордо" интернет сайтында дагы үч жылдай спорттук баяндамачы катары макалалары жарыяланып турду.

2016-жылдан бери "Спутник-Кыргызстан" маалымат агентигинде штаттан тышкары кабарчы, колумнист катары кызматташып келүүдө.

Кабыл Макештин демилгеси менен 1995-жылы Кыргызстандын спорт журналисттеринин федерациясы уюшулган.

1995-жылдан бери Эл аралык спорт журналисттер ассоциациясынын (AIPS) мүчөсү.

Кабыл 2003-жылдан Кыргызстандын спорт журналисттер федерацияcынын башкы катчысы болуп саналат.

Кабыл Макеш спорттук баяндамачы катары Атланта, Сидней, Афина, Бээжин,Лондон, Рио-де-Жанейро жайкы олимпиадалык оюндарына жана Солт-Лейк-Сити, Турин,Сочи,Пхенчхен кышкы олимпиадаларына барып, «Азаттык үналгысына» жана "Эркин Европа-Азаттык үналгысынын" казак, түркмөн кызматтарына жана Би-Би-Си радиосуна түз репортаж уюштуруп турган.

Ошондой эле Бангкок, Пусан,Доха,Гуанджоу, Астана жана Алматы,Инчхон шаарларында өткөн Азия оюндарына катышып, «Азаттык үналгысына» түз репортаж уюштурган.

Мындан сырткары AIPSтин Түштүк Корея, Испания, Канада, АКШ, Кытай, Катар,Улуу Британия, Орусия,Малайзия,Иран,Италия өлкөлөрүндө өткөн Конгресстерине Кыргызстандан делегат болуп катышкан.

Анын журналисттик ишмердиги Кыргызстандын журналисттер кошуунунун, спорт федерацияларынын, кыргыз дене тарбия жана спорт агенттигинин сыйлыктары менен бааланган.

Спортко бала кызыгып, эркин күрөш, лыжа менен чуркоо, жеңил атлетика спорт ийримдеринде машыккан. Спорттон сырткары элдик медицинага, улуттук адабиятка, архитектурага кызыгат. Спорттук, олимпиадалык белгилерди (значок) чогултат.

Кыргыз спортунун тарыхын жана спорттук энциклопедияны жазып, "Кыргызстан: дене тарбия жана спорт энциклопедиясы" аттуу түстүү, 37 басма табак көлөмдөгү китеби 2011-жылдын этегинде жарыялады.

2012-жылдын 20-декабрында Кыргызстандын олимпиадалык кыймылынын тарыхын, байге алган олимпиадачылар, Азия оюндар тууралуу кеңири баяндалган "Кыргыз Республикасы: Олимпиаданын санжыралуу жолунда" деген 27 басма табак көлөмүндөгү түстүү китеби жарык көрдү.

2014-жылы сентябрь айында англис жана кыргыз тилдериде "Азия Олимпиадалык Кенеши: Азия оюндарынын тарыхы" аттуу
түстүү, 35 басма табак көлөмдөгү китеби жарык көрдү.

2015-жылы май айында Кыргыз спортунун тарыхын жана спорттук энциклопедияны толуктап жазып, "Кыргыз Республикасы: Дене тарбия жана спорт энциклопедиясы" аттуу түстүү, 56 басма табак көлөмдөгү китебинин экинчи басылышы чыкты.

2015-жылдын сентябрь айында " Кыргыз Республикасы: Грек-рим курошу: түстүү, 18 басма табак көлөмдөгү китеби "Турар" басманканасынан басылып чыкты.

2017-жылы "Абакир - азыркынын Кошойу" деген китеби "Улуу Тоолор" басмасынан жарык көргөн.

2017-жылы "Жусуп Иманалиев - биринчи мугалим" деген китеби "Турар" басмасынан басылып чыкты.

Үй-бүлөсү[оңдоо | булагын оңдоо]

Үй-бүлөлүү, жолдошу Динар Карыбаеванын кесиби да журналист.

Улуу уулу Жоомарт Макешов 2012-жылы Кыргыз мамлекеттик медициналык академиясын бүткөн. Чуй облусттук ооруканада невролог-врач

Кызы Жанар 2012-жылы Кыргыз улуттук университетин психология адистиги менен бүтүп, Бишкектеги Шералы Сыдыков атындагы республикалык Олимпиадалык резерв окуу жайында психолог-мугалим болуп иштеген.Азыркы учурда аутизм боюнча психолог болуп Эл Аралык уюмда иштейт. Жанардын жолдошу Азаматтын кесиби юрист. Экөө 2017-жылы 12-октябрда төрөлгөн Нураалы деген уулду тарбиялап жатышат.

Кичүү уулу Бишкектеги Улуттук компьютердик гимназиянын 9-классын бүтүп, 2018-жылы Бишкек шаарындагы Мураталы Күрөңкеев атындагы музыкалык окуу жайында комуз адистиги боюнча окуп жатат. Ошондой эле Номер 9 музыкалык мектепте комуз классында да бүткөн.

Сыйлыктары. Наамдары[оңдоо | булагын оңдоо]

2000-жылы Кыргызстандын улуттук олимпиада комитетинин «Олимпиадалык алтын ордени» менен сыйланган.

2010-жылы Кыргыз Республикасынын Ардак Грамотасы менен сыйланган.

2008-жылы “Дене тарбия жана спорттун мыктысы (отличниги) ” төш белгиси менен да сыйланган.

2010-жылы Бишкек мэриясынын Москва олимпиадасынын коло байге ээси Сатымкул Жуманазаров атындагы сыйлык менен сыйланган.

1992,1994,1996,1997,1998,1999, 2000,2001,2002,2004,2006, 2008, 2009, 2010, 2011, 2012, 2013, 2014-2015, 2016-жылдары Кыргызстандын мыкты спорттук журналистти деп таанылып, урмат-сыйга арзыган.

Адабият тизмеси[оңдоо | булагын оңдоо]

  • Макешов, Кабыл. Кыргызстан: Дене тарбия жана спорт энциклопедиясы. - Бишкек: Турар, 2011. - 298 бет, сүрөттөр. - ISBN 978-9967-15-107-9.
  • Макешов, Кабыл. Кыргыз Республикасы: Олимпиаданын санжыралуу жолунда. -Бишкек: Турар, 2012. - 222 бет, сүрөттөр. - ISBN 978-9967-15-204-5.
  • Макешов, Кабыл. Азия Олимпиадалык кенеши: Азия оюндарынын тарыхы (англис, кыргыз тилдеринде). - Бишкек: Турар, 2014. - 398 бет, сүрөттөр
  • Макешов, Кабыл. Кыргыз Республикасы: Дене тарбия жана спорт энциклопедиясы. - Бишкек: Турар, 2015. (толукталып, 2-басылышы) - 450 бет, сүрөттөр. - ISBN 978-9967-15-107-9.
  • Макешов, Кабыл. Кыргыз Республикасы: Грек-рим курошу-Улут сыймыгы. - Бишкек: Турар, 2015.- 1300 бет, сүрөттөр. - ISBN 978-9967-15-107-9.

Интернеттеги шилтемелер[оңдоо | булагын оңдоо]