Панама шаары
Панама шаары – Панама Республикасынын борбору. Панама булуңунун жээгинде жайгашкан. Климаты тропиктик. Жылдык жаан-чачыны 1750 мм (май-декабрь) жана жылдык орточо температурасы 23°Стан 28°Ска чейин. Панамерика жолунда. Тынч океандан Панама каналына кире бериштеги ири порт. Калкы 440 миң (2011; агломерациясы менен 1,3 млн); негизинен калкы Панама каналы аркылуу өткөн кемелерди тейлейт. Эл аралык аэропорту бар. Тамак-аш, текстиль, электроника, электр-техникалык, цемент өнөр-жай ишканалары иштейт. Эки университет, улуттук музей, китепкана, консерватория, театрлар бар. Испандар тарабынан 1519-ж. негизделген. 1990-ж. Панамада саясий кырдаал турукташкандан экономикалык жактан өнүгүү башталды. 17–18-кылымдарга таандык соборлор жана чиркөөлөр, Эски Панамада (каракчылар тарабынан 1671-ж. өрттөлгөн) 16–17-кылымдардын курулуштары сакталган. Шаар туристтерди анча кызыктырбаганы менен дүйнөдөгү белгилүү энтомологдор (миңдеген көпөлөктөрдүн сейрек кездешкен түрүн изилдөө үчүн) жыл сайын келип турушат. Шаар бүткүл дүйнөлүк мурастын тизмесине киргизилген.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117 -9