Аляскит

Аляскит - (Аляска жарым аралынын атынан) - курамы калийлүү талаа шпатынан (ортоклаз же микроклин) жана кварцтан (25-55%) турган ачык түстүү (лейкократтуу) гранит тибиндеги магма тоотеги. 1900-ж. америкалык геолог Дж. Спёр аныктаган. Структуралык түзүлүшү бүртүктүү, чанда порфир сымал, өңү кызгылт, ак, бозомук. Аляскит менен сейрек кездешүүчү металлдардын кендери байланыштуу. Аляскит имараттардын дубалын кооздоодо, каптооч курулуш материалдары катары пайдаланылат.

Колдонулган адабияттар

“Кыргызстан” улуттук энциклопедиясы: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1