Каравшин

Каравшин, Керавшин (согд, ягноб тилдеринде гар – тоо; аб/ав – суу; шин – молдуулукту билдирген мүчө; тоо суусу маанисинде) – Баткен районундагы суу, Исфара суусунун сол куймасы. Узундугу 46 км, алабынын аянты 895 км², деңиз деңгээлинен Орточо бийиктиги 3600 м. Түркстан кырка тоосунун Түндүк капталындагы мөңгүдөн башталып, токойлуу капчыгай аркылуу агат. Киндик суусу (оң куймасы) кошулгандан кийин өрөөнү жайылып, жай агат. Ири куймалары: Киндик (оң), Ортоашма (сол). Негизинен кар, мөңгү жана булак сууларынан куралат. Жылдык Орточо чыгымы 5–7 м³/сек, эң көбү июнь–июлда, эң азы февраль–мартта байкалат. Сугатка пайдаланылат.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9