Коёнду мөңгүлөрү

Коёнду мөңгүлөрү - Борбордук Теңир-Тоодогу Ак-Шыйрак тоо тоомунун түштүк-чыгыш капталында жанаша жаткан үч мөңгү (Коёнду, Сол жана Оң Коёнду). Коёнду - татаал өрөөн тибиндеги мөңгү. Узундугу 8 км, аянты 24,3 км². Башы деңиз деңгээлинен 5000 м, этеги 3850 м бийикте жатат. Кар чегинин бийиктиги 4425 м. Абляциясынын аянты 7,7 км². Мөңгү жалпак фирн талаасы менен капталган. Коёнду ашуусу аркылуу Түштүк Кара-Сай мөңгүсүнө туташып, бир системаны түзөт. Акыркы жылдарда бир топ кыскарган. 1933 жана 1943-ж. Сол жана Оң Коёнду мөңгүлөрүнө бөлүнүп кеткен. Сол-Коёнду мөңгүсүнүн узундугу 5,1 км, аянты 8,1 км². Өрөөн тибиндеги мөңгү. Башы деңиз деңгээлинен 4917 м, этеги 3880 м бийикте жайгашкан. Кар чегинин бийиктиги 4490 м. Абляциясынын аянты 4,5 км². Оң Коёнду мөңгүсүнүн узундугу 5,1 км, аянты 7,3 км², көлөмү 0,715 км³. Өрөөн тибиндеги мөңгү. Башы деңиз деңгээлинен 5100 м, этеги 3880 м бийикте жатат. Кар чегинин бийиктиги 4200 м. Абляциясынын аянты 1,9 км². Мөңгүлөрдөн Ак-Шыйрактын сол куймасы - Коёнду суусу башталат.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9