Ллойд Жорж Дэвид

Wikipedia дан

Ллойд Жорж Дэвид (17. 1. 1863, Манчестер – 26. 3. 1945, Уэльс, Карнарвоншир, Лланистимдуиге жакын Тай-Неуит) – Британиянын мамлекеттик жана саясий ишмери; Либералдык партиянын лидерлеринин бири. Мугалимдин үй-бүлөсүндө туулуп, юридикалык кызматтарда иштеген. 1888-ж. Уэльстеги Карнарвоншир графтыгынын муниципалдык кеңешине олдермен болуп шайланган. 1890–1945-ж. британ парламентинин Общиналар палатасына депутат (Либералдык партиядан). 1905–08-ж. Г. Кэмпбелл-Баннермандын либералдык кабинетинде соода министри, 1908–15-ж. Г. Г. Асквиттин өкмөтүндө финансы министри. Консерваторлордун колдоосуна таянып, 1916-ж. декабрда Асквиттин либералдык өкмөтүн кулаткан. 1919–22-ж. коалициялык өкмөттүн премьер-министри болгон. 1919–20-ж. Париж тынчтык конференциясында көрүнүктүү роль ойноп, Версаль тынчтык келишимин (1919) түзүү демилгесин көтөргөн. 1919–20-ж. Түркиядагы улуттук-боштондук кыймылга каршы согушту жактаган. Гитлердин улутчул саясатын колдоп, СССРге каршы күрөш жүргүзүүгө умтулган. Фашисттик бийликтин саясатына туура түшүнгөндөн кийин, Англияны СССР менен достук мамиле түзүүгө чакырган. 1945-ж. граф титулун алган.

Колдонулган адабияттар[оңдоо | булагын оңдоо]

  • “Кыргызстан”. Улуттук энциклопедия: 5-том. Башкы ред. Асанов Ү. А., Б.: «Кыргыз энциклопедиясы» башкы редакциясы, 2014. ISBN 978—9967—14-111-7