Батперек учургандар
"Батперек учургандар" (англ. The Kite Runner, орус. Бегущий за ветром) - 2007-жылы Марк Форстер тарткан америкалык драма. Тасманын сценарийи Халид Хосейнинин ошол эле аталыштагы романына негизделип, Дэвид Бениофф тарабынан жазылган. Тасмада Кабул шаарыннын Вазир Акбар Хан аймагында жашаган жетиштүү үй-бүлөнун уулу Амир тууралуу баяндалат. Ал атасынын хазар улутундагы кызматкеринин уулу Хассанды таштап кеткендиги үчүн өзүн-өзү жемелеп өтөт. Тасма Афганистандагы монархиянын кулашынан тарта Советтик аскерлердин өлкөгө киришине, көп сандаган афган качкындарынын Пакистан, Кошмо Штаттарга кеткенине чейинки башаламан окуяларды жана Талибан режимин чагылдырат.
Тасма 2007-жылы, 2-ноябрда көрүүчүлөргө сунушталган. 20 миллион доллар бюджет менен тартылган тасма 73.2 миллион доллар табуу менен кассалык жыйымдар боюнча ийгилик жараткан. Тасма "Алтын глобус" сыйлыгынын 2007-жылдагы "Эң мыкты чет тилдеги тасма" наамына көрсөтүлгөн. Ал эми Алберто Иглесиас жазган музыка "Алтын Глобус" жана "Оскар" сыйлыктарынын "Эң мыкты музыка" наамдарына көрсөтүлгөн.