Батый жапырыгы

Батый жапырыгы – башында Батый хан турган моңголдордун Чыгыш жана Борбордук Европага жасаган баскынчылык жортуулу. 1236–1241-жылдары Волга боюндагы Болгарияны басып алган. 1237–1238-жылдары орустардын түштүк-чыгыш аймагына, 1238–1240-жылдары кыпчак жана алан уруулук бирикмелерине жортуул жасап, 1240-жылы түштүк орус аймагын басып алган. 1241–1242-жылдары моңголдор Борбордук жана Түштүк-чыгыш Европага Адриатика деңизине чейин жортуул жасаган. Борбордук Европаны бекем кармап тура албай кайра артка кайткан. Чыгыш Европа жерлери бүлгүнгө учурап, орус жерлеринде моңголдордун эзүүсү башталат.

Колдонулган адабият

• “Кыргыз Тарыхы. Энциклопедия” Бишкек 2003.
• “Мамлекеттик тил жана энциклопедия борбору”
• “И.Арабаев атындагы Кыргыз мамлекеттик Педагогикалык университети”
• “Башкы ред. Ү.А.Асанов, жооптуу ред. А.А. Асанков”.
• “Ред кеңеш: Ө.Ж.Осмонов (төрага) Т.Н Өмүрбеков”