Көрпө-Тоо
Көрпө-Тоо – Ички Теңир-Тоодо. Ак-Сай өрөөнүнүн түштүгүндө. Ат-Башы районунун аймагында. Какшаал тоо тизмегинин батышынан орун алып, меридиан багытында дого сымал 36 кмге созулат. Туурасы 18 км. Орточо бийиктиги 4200 м, эң бийик жери 4552 м. Тоонун суу бөлгүчү Ак-Сай өрөөнүнүн таманынан 800—1000 мге көтөрүлүп жатат. Кырында тоонун тектон. көтөрүшүнө чейинки байыркы түздүктөрдүн калдыктары сакталган. Мөңгүнүн жалпы аянты 25 км2. Батыш капталы жазыраак келип, Ак-Сай өрөөнүнө жантайып түшөт. Чыгышы кыска, Корумду өрөөнүн карай тик.
Ашуулары: Кичи (3630 м) жана Чоң (4020 м), Сары-Белес, Түз-Ашуу (3590 м) ж. б. Тоодон Ак-Сайдын оң куймалары агып түшөт. Карбон менен девондун кумдук, сланец, кремний, конгломерат, акиташ тектеринен туруп, кеңдик багытындагы тектоникалык жаракалар менен тилмеленген. 3900 м бийикке чейин субальп, альп шалбаасы, шалбаалуу талаа, субнивалдык суук чөл, андан жогору нивалдык-гляциалдык тилке ээлейт.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9
- Мамлекеттик тил жана энциклопедия борбору. Кыргызстандын географиясы. Archived 2014-07-14 at the Wayback Machine ISBN 9967-14-006-2