Лорилер

Лорилер (лат. Lorisidae) – чала маймылдар тукуму. Дене узундугу 22–26 смден 35–40 смге жетет. Куйругу кыска же узун, кээде жок болушу да мүмкүн. Манжасы бутак кармоого ыңгайланган. Көзү чоң, айрымдарыныкы тегерете кара алкак менен курчалып, ак сызык менен бөлүнгөн. Кулагы кичине. Тиричилигин түнкүсүн көбүнчө бакта өткөрөт. Бактын бутагын бекем кармап, башын же жонун төмөн каратып илинип турат. Күндүз жыгач оюгунда же калың жалбырак арасына уктайт. Ылгабай азыктанат. Бир аз топ түзүп, жалгыздан же түгөйү менен жүрөт. 1–2 бала тууйт, алар бир суткадан кийин эле бакка илинип жүрө алат. Лорилердин 2 тукумчасы, 4 уруусу, 11 түрү Түндүк Чыгыш Азияда, Африкада таралган.

Колдонулган адабияттар

А. А. Алдашев. Биология терминдеринин жана айбанат аттарынын орусча-кыргызча сөздүгү. - Бишкек, 1998. ISBN 9967-11-027-9
“Кыргызстан”. Улуттук энциклопедия: 5-том. Башкы ред. Асанов Ү. А., Б.: «Кыргыз энциклопедиясы» башкы редакциясы, 2014. ISBN 978—9967—14-111-7