Салуин

Салуин, Салуэн - Кытай менен Бирмадагы дарыя; бир аз бөлүгү Бирма менен Тайланддын чек арасы аркылуу агат. Узундугу 3200 км, алабынын аянты 325 миң км²ге жакын. Тангла кырка тоосундагы мөңгүдөн башталып, Юньнань жана Шань тайпак тоолорундагы терең капчыгайлар (3000 мге чейин) аркылуу агып, босого жана шаркыратмаларды пайда кылат. Төмөнкү бөлүгүндө жээк түздүктөр менен өтүп, Андаман деңизине 2 салаага бөлүнүп куят. Орт. чыгымы 6700 м³/сек; жайында ташкындайт (капчыгайларда суунун денгээли 15 м, кээде андан да жогору көтөрүлөт). Төмөнкү агымында карагай агызылып, кеме жүрөт. Чатында Моламьяйн (Бирма) деңиз порту бар.

Колдонулган адабияттар

“Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9