Монблан

Монблан (фр. Mont Blanc, ит. Monte Bianco) – Батыш Европадагы эң бийик тоо массиви жана чоку (4807 м); Франция менен Италиянын чек арасында. Узундугу 50 км. Гранит, гнейс, кристаллдык сланец тоо тектеринен түзүлгөн. Өтө тилмеленген альп тибиндеги рельеф мүнөздүү. Кар чеги 2850–3100 м бийиктен өтөт. По жана Рона дарыясынын суу бөлгүчү. Мөңгүлүү (аянты 200 км²ден ашык; ири мөңгүсү – Мер-де-Глас). Альпинизм, туризм өнүккөн. Астрологиялык жана метеорологиялык обсерваториялар иштейт. Монбландагы тешкен тоо (тоннель уз. 11,6 км) аркылуу Францияны Италия менен байланыштырган автомобиль жолу өтөт.

Байланыштуу макалалар

Альп тоолору

Колдонулган адабияттар

“Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111-7