Палеоазия тилдери
Палеоазия тилдери, Байыркы Азия тилдери – Түндүк жана Түндүк-Чыгыш Сибирдин, Түндүк Американын аз сандагы элдери сүйлөгөн, теги ар башка тилдердин шарттуу аталышы. Орус илимпозу Л. И. Шренк бул жерде жашаган элди Түндүк Азиядагы байыркы элдердин укум-тукумдарынан экендигин божомолдогон. Палеоазия тилдерине бир тектүү 4 топ жана бир обочолонгон тил кирет:
- чукча-камчатка (чукча, коряк, алютор, керек жана ительмен тилдери)
- эскимос-алеут (эскимос жана алеут тилдери)
- юкагир-чуван (юкагир тили жана өлүү тил - чуван)
- енисей (кет тили жана өлүү тилдер – котт, арин, асан ж. б.)
- нивх тили
Теги ар башка болгону менен морфологиялык түзүлүшүндө жалпылык бар, б. а. Палеоазия тилдеринин көбү – агглютинацияланма тилдер. Бирок агглютинация бул тилдердин бардыгында бирдей мүнөзгө ээ эмес. Палеоазия тилдерин изилдөөдө В. Г. Богораз, Л. Я. Штернберг, И. И. Мещанинов сыяктуу окумуштуулар салым кошкон.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9