Садык Шер-Нияз

Wikipedia дан

Садык Шер-Нияз - жазуучу, продюсер, кинорежиссер, сценарист. Манас районунун Чоң-Капка айылында 1969-жылы 10-мартта туулган. 1983–1987-жж. Бишкектеги машина-куруу техникумун окуп бүтүргөн. 1994–2000-жж. Кыргыз мамлекеттик университетинин юридикалык факультетинде окуган.

Эмгек жолун 1994–1996-жж. “Шер” ӨКФсында юрист-консультант болуп иштөө менен баштаган. 1996–1998-жж. “Ачекей” жеке ишканасында директор, 1998–2004-жж. Кыргыз Республикасынын Жогорку Кенешинин депутатынын жардамчысы, 2004-жылдын октябрь айында Кыргыз Республикасынын Жогорку Кеңеши аркылуу Кыргыз Республикасынын Акыйкатчысынын орун басары болуп шайланган. Кыргыз Республикасынын III даражадагы Мамлекеттик кеңешчиси.

2007-2008-жж. Москва шаарындагы Сценаристтердин жана режиссерлордун жогорку курсунун (В.И.Хотиненконун өнөрканасы) режиссердук бөлүмүн аяктаган. 2009-жылы ошол эле курстун продюссердик бөлүмүндө окуган.

1995-жылы Республикалык “Айтыш” коомдук фондун түптөгөн. Фонддун алкагында 2000-жылы жаш жазма акын-жазуучуларды колдоо максатында “Калемгер” адабий клубу, 2006-жылы “Айтыш Фильм” киностудиясы түзүлгөн. Учурда студиянын фильмографиясында 20дан ашуун көркөм, документалдуу жана анимациялык фильмдер бар.

“Парз”, “Биринчи кадр”, “Гүл”, “Аян” ж.б. фильмдеринин сценарийлеринин автору жана продюсери, “Биринчи кадр”, “Форс-мажор”, “Аян” фильмдеринин режиссеру. 

2003-жылы кыргыз элинин акындык жана дастанчылык өнөрү ЮНЕСКО аркылуу Адамзаттын руханий шедеври катары таанылып, Кыргызстан мындай руханий шедеврге ээ 28 өлкөнүн катарына кирген. Акындык өнөрдүн бүткүл дүйнөлүк руханий шедеври катары таанылышына кошкон салымы үчүн ЮНЕСКОнун генералдык директору Коитиро Мацууранын өзгөчө алкышына татыган.

“Боорукер – 2002” эл аралык фондунун сыйлыгын алган.

2007-жылы Россиянын “Новое кино” эл аралык кинофестивалынын “За лучший комедийный сценарий” дипломуна татыктуу болгон.

2007-жылы Кыргыз Республикасынын Акыйкатчысынын “Акыйкат” медалы менен сыйланган.

2002-2007-жж. “Кыргыз Туусу”, “Агым”, “Кыргызстан маданияты”, “Бишкек таймс”, “Аалам” гезиттеринин жана “Замандаш” ассоциациясынын рейтингинде “Жылдын мыкты адамы” жана “Жылдын мыкты коомдук ишмери” болуп таанылган.

2006-жылы Кыргыз Республикасынын Ардак грамотасы менен сыйланган.

2005-жылдан бери Кыргыз Республикасынын Улуттук жазуучулар союзунун жана Кыргыз Республикасынын маданий ишмерлеринин ассамблеясынын мүчөсү.


Жарык көргөн китеби[оңдоо | булагын оңдоо]

Ак таңдайлар. – Б.: Бийиктик, 2005. – 250 б. (авторлош).


Колдонулган адабияттар[оңдоо | булагын оңдоо]